“மது குடிக்க பணம் கொடு…” மறுத்த தந்தையை மரக்கட்டையால் அடித்துக் கொன்ற கொடூர மகன்..! நெஞ்சை பதறவைக்கும் சம்பவம்..!!

உத்தரப் பிரதேச மாநிலம் தேவரியா மாவட்டத்தின் சுெளலி காவல் எல்லைக்குட்பட்ட பஹோர்வா கிராமத்தில், மது அருந்தப் பணம் தராததால் பெற்ற தந்தையையே மகன் கட்டையால் அடித்துக் கொன்ற அதிர்ச்சி சம்பவம் நடந்துள்ளது. இச்சம்பவத்தில் உயிரிழந்தவர் ராம்அவதார் ராய் ஆவார். அவரது மகனான சுனில் என்ற சத்து ராய் என்பவர், மது குடிக்கப் பணம் கேட்டு தந்தையிடம் தகராறு செய்துள்ளார். தந்தை பணம் தர மறுத்ததால் ஆத்திரமடைந்த மகன், மரக்கட்டையால் தந்தையின் தலையில் பலமாகத் தாக்கியுள்ளார்.

படுகாயமடைந்து ரத்த வெள்ளத்தில் சரிந்த ராம்அவதார் ராயை, அவரது குடும்பத்தினரும் கிராம மக்களும் மீட்டு மகரிஷி தேவ்ரஹா பாபா மருத்துவக் கல்லூரி மருத்துவமனைக்கு சிகிச்சைக்காகக் கொண்டு சென்றனர். ஆனால், அங்கு அவரைப் பரிசோதித்த மருத்துவர்கள் அவர் ஏற்கனவே இறந்துவிட்டதாக அறிவித்தனர். இதனையடுத்து உயிரிழந்தவரின் உடல் பிரேதப் பரிசோதனைக்காக அனுப்பப்பட்டது. கைது செய்யப்படுவோம் என்ற பயத்தில் குற்றவாளியான மகன் சம்பவ இடத்திலிருந்து தப்பி ஓடிவிட்டார்.

கிராம மக்களின் கூற்றுப்படி, குற்றம் சாட்டப்பட்ட சுனில் தீவிர மதுப்பழக்கத்திற்கு அடிமையானவர் என்றும், மதுப் பணத்திற்காக வீட்டில் அடிக்கடி குடும்பத்தினருடன் தகராறு செய்து வந்ததாகவும் தெரியவந்துள்ளது. இச்சம்பவம் தொடர்பாகப் பேசிய பர்ஹஜ் காவல்துறை அதிகாரி ரஞ்சனா சச்சன், புகாரின் அடிப்படையில் வழக்குப் பதிவு செய்யப்பட்டு சட்டப்பூர்வ நடவடிக்கைகள் மேற்கொள்ளப்பட்டு வருவதாகவும், தப்பியோடிய மகனைப் பிடிக்க தனிப்படை அமைத்துத் தீவிரத் தேடுதல் வேட்டை நடத்தப்பட்டு வருவதாகவும் தெரிவித்துள்ளார்.