LATEST NEWS
“அவரைப் பார்த்த உடனே தோணுச்சு..” சாப்பாட்டுக்காகச் சென்ற இடத்தில் மலர்ந்த காதல…! ராஜீவ் காந்தியை முதன்முதலில் சந்தித்த தருணத்தைப் பகிர்ந்த சோனியா காந்தி..!!
இங்கிலாந்தின் கேம்பிரிட்ஜ் நகரில் உள்ள ஒரு சிறிய உணவகத்தில், உணவருந்தியபோது நடந்த ஒரு தற்செயலான சந்திப்புதான் சோனியா காந்திக்கும், பின்னர் இந்தியாவின் பிரதமராகப் பதவியேற்ற ராஜீவ் காந்திக்கும் இடையேயான காதல் கதைக்குத் தொடக்கமாக அமைந்தது. தங்களது முதல் சந்திப்பைப்பற்றி சோனியா காந்தி தனது வரவிருக்கும் நினைவுக் குறிப்பான ‘பிலாங்கிங்: எ ஜர்னி ஆஃப் லவ்’ புத்தகத்தின் முன்னோட்டப் பகுதியில் பகிர்ந்து கொண்டுள்ளார். 1965ஆம் ஆண்டில் கேம்பிரிட்ஜில் உள்ள ‘வார்சிட்டி ரெஸ்டாரண்ட்’ என்ற பிரபலமான உணவகத்தில்தான் இருவரும் முதன்முதலில் சந்தித்துக் கொண்டனர். வெளிநாட்டு மாணவர்கள் பலரும் கூடும் அந்த இடத்தில், பொதுவான நண்பர் ஒருவர் மூலம் சோனியா காந்திக்கும் ராஜீவ் காந்திக்கும் அறிமுகம் கிடைத்தது; அந்தச் சந்திப்பு அவர்களை இணைக்கும் திருமணமாக மாறும் என்பதை அப்போது அவர்கள் அறியவில்லை.
ராஜீவ் காந்தியை முதன்முதலில் பார்த்தது பற்றிய தனது அனுபவத்தைக் கூறும் சோனியா காந்தி, அவர் மீது தனக்கு உடனடியாக ஒரு ஈர்ப்பு ஏற்பட்டதாகத் தெரிவித்துள்ளார். “நான் அவரை முதன்முதலில் சந்தித்தபோதே, அவருடன் இருக்க வேண்டும் என்று விரும்பினேன்; அவருக்கும் அதே போன்ற உணர்வுதான் இருந்தது என்பதைப் பின்னர் தெரிந்து கொண்டேன்” என்று அவர் கூறியுள்ளார். ராஜீவ் காந்தியின் தோற்றத்தைக் கடந்து அவரது மென்மையான சுபாவமே தன்னை மிகவும் ஈர்த்ததாகக் குறிப்பிட்டுள்ள சோனியா, “அவர் மிகவும் சாதுவான தோற்றம் கொண்டவராக இருந்தார், நிச்சயமாக அவர் அழகாகவும் இருந்தார், ஆனால் அந்த மென்மைத்தன்மைதான் என்னை மிகவும் ஸ்பரிசித்தது” என்று நினைவுகூர்ந்துள்ளார்.
கேம்பிரிட்ஜில் மாணவர்களாக இருந்த காலகட்டத்தில் பொதுவான நண்பர்களின் கூட்டங்கள், விருந்துகள் மற்றும் சுற்றுலாக்கள் மூலம் இவர்களது நட்பு மெல்லக் காதலாக மலர்ந்தது. அரசியலின் பொதுவெளி வெளிச்சங்களுக்கு வெகு தொலைவில், சாதாரண மாணவர்களாக இருந்த அந்த நினைவுகளைப் புகைப்படங்களுடன் சோனியா காந்தி பகிர்ந்து கொண்டுள்ளார். பின்னர் 1968ஆம் ஆண்டில் இவர்கள் திருமணம் செய்து கொண்டனர். அரசியலில் நுழைந்த ராஜீவ் காந்தி 1984 முதல் 1989 வரை இந்தியாவின் பிரதமராகப் பணியாற்றினார் என்பது குறிப்பிடத்தக்கது.
