உலகமே இடிஞ்சு விழுந்த மாதிரி ஒரு ஷாக்… உருகி உருகி காதலிச்ச பொண்ணு யாருடா..? சொத்துக்களை விற்று 1,200 மைல் பறந்த நபருக்கு இப்படியொரு சம்பவம்..!!

பிரேசிலில் சமூக வலைதளத்தில் பழகிய ஒரு பெண்ணைத் திருமணம் செய்ய ஆசைப்பட்டு, தனது சொத்துக்கள் அனைத்தையும் விற்றுவிட்டுச் சென்ற 49 வயதான மார்டின் என்ற நபர் மிகக் கொடூரமாக ஏமாற்றமடைந்துள்ளார். தனது தாயின் மறைவுக்குப் பின் கடுமையான தனிமையில் வாடி வந்த மார்டினுக்கு, சமூக வலைதள பக்கத்தில் ஒரு பெண்ணின் நட்பு கிடைத்துள்ளது. அந்தப் பெண்ணுடன் தொடர்ந்து பேசி வந்த அவர், அவளையே தனது வாழ்க்கைத் துணையாக்கிக் கொள்ள முடிவு செய்து, ஒரு புதிய வாழ்க்கையைத் தொடங்கும் ஆசையில் இந்த விபரீத முடிவை எடுத்துள்ளார்.

அந்தப் பெண்ணை நேரில் சந்தித்துத் திருமணம் செய்துகொள்வதற்காக, அவர் தனது சொந்த ஊரிலிருந்து சுமார் 1,200 மைல்கள் தொலைவில் உள்ள பிரேசில் நாட்டின் மற்றொரு பகுதிக்கு நீண்ட தூரப் பயணத்தை மேற்கொண்டார். அவளது காதலில் முழுமையாக மூழ்கியிருந்த மார்டின், அங்கு செல்வதற்கு முன்பாகவே அவளது எதிர்காலத் தேவைகளுக்காகவும், பயணச் செலவுகளுக்காகவும் தனக்குச் சொந்தமான ஒட்டுமொத்த சொத்துக்களையும் விற்று பணமாக்கிக் கொண்டு சென்றுள்ளார்.

ஆனால், அவர் குறிப்பிட்ட இடத்திற்குச் சென்று தீர விசாரித்தபோதுதான் அந்தப் பேரதிர்ச்சி அவருக்குக் காத்திருந்தது. அவர் காதலித்துத் திருமணம் செய்ய நினைத்த பெண் நிஜ உலகிலேயே இல்லை என்பதும், அது ஒரு போலியான கணக்கு என்பதும் தெரியவந்தது. தான் இத்தனை நாட்களாக உருகி உருகிக் காதலித்தது ஒரு நிஜப் பெண்ணை அல்ல, அது செயற்கை நுண்ணறிவால் (AI) உருவாக்கப்பட்ட ஒரு வெறும் கற்பனைத் தோற்றம் என்பதை உணர்ந்து அவர் நிலைகுலைந்து போயுள்ளார்.