“காடு குப்பைத்தொட்டி அல்ல.. அது விலங்குகளின் வீடு..” குப்பை மேட்டில் உணவைத் தேடும் யானையின் பரிதாப நிலை… மனதை உலுக்கும் வைரல் வீடியோ..!!

காடு என்பது வனவிலங்குகளின் புகலிடமாகும். ஆனால், மனிதர்களின் அலட்சியப் போக்கினால் அத்தகைய காடுகளும் குப்பை மேடுகளாக மாறி வருகின்றன. இதை உணர்த்தும் வகையில், இன்ஸ்டாகிராமில் aesthetic_voyager_ எனும் கணக்கில் பகிரப்பட்ட ஒரு வீடியோ வைரலாகி இணையவாசிகளின் மனதை நெகிழ வைத்துள்ளது. வழக்கமாக காடுகளில் சுதந்திரமாகச் சுற்றித் திரிந்து, மரங்களின் இலை தழைகளைத் தின்று வாழ வேண்டிய யானை ஒன்று, காட்டுப் பாதையின் ஓரத்தில் கொட்டப்பட்டுள்ள மிகப்பெரிய குப்பைக் கழிவுகளுக்கிடையே தனக்கான உணவைத் தேடி உண்டு கொண்டிருக்கும் பரிதாபக் காட்சி அந்த வீடியோவில் பதிவாகியுள்ளது.

இந்த வீடியோவைப் பகிர்ந்த ஹேரி மல்ஹோத்ரா, தான் வீட்டிற்குத் திரும்பும் வழியில் யானையைக் கண்டு முதலில் மகிழ்ச்சியடைந்தாலும், அது குப்பையில் உணவைத் தேடுவதைப் பார்த்து மிகுந்த மனவேதனை அடைந்ததாகக் குறிப்பிட்டுள்ளார். யானையின் இந்த நிலையைப் பார்த்து அதற்குக் கொடுக்க வாழைப்பழங்களைத் தேடிப் பார்த்தும் கிடைக்காததால், பன் (Bun) வாங்கி வந்து கொடுக்க முயன்றார். ஆனால், மனிதர் நெருங்கி வருவதைக் கண்டு அச்சமடைந்த அந்த யானை மீண்டும் காட்டிற்குள் ஓடிவிட்டது. “காடு விலங்குகளின் இல்லம், அது மனிதர்கள் குப்பை கொட்டும் குப்பைத்தொட்டி அல்ல” என்ற மிக முக்கியமான செய்தியை இந்த அனுபவத்தின் மூலம் அவர் வலியுறுத்தியுள்ளார்.

https://www.instagram.com/reel/DeD_CNQS2-R/?utm_source=ig_web_button_share_sheet

இச்சம்பவம் சமூக வலைதளங்களில் மிகப்பெரிய விவாதத்தையும், மக்களின் கொந்தளிப்பையும் ஏற்படுத்தியுள்ளது. வீடியோவைப் பார்த்த பயனர் ஒருவர், “சுற்றுச்சூழல் பற்றி கவலைப்படாமல் மக்கள் தங்கள் வீடுகளை மட்டும் சுத்தமாக வைத்தால் போதும் என்று நினைக்கிறார்கள்” என்று காட்டமாகக் கருத்து தெரிவித்துள்ளார். அதே வேளையில், வனவிலங்குகளுக்கு மனிதர்கள் தானாக முன்வந்து உணவளிப்பது சரியல்ல என்றும், காடுகளுக்குள் கழிவுகளைக் கொட்டுவதைத் தடுத்து அவற்றின் இயற்கையான வாழிடத்தைப் பாதுகாப்பதே உண்மையான தீர்வு என்றும் மற்ற பயனர்கள் வலியுறுத்தியுள்ளனர்.