என் வாழ்க்கையின் மிகப்பெரிய இழப்பு இதுதான்….!” – தனுஷை தந்தை என நினைத்த விக்னேஷ் சிவனின் கண்ணீர் வாக்குமூலம்….!

சமீபத்திய நேர்காணல் ஒன்றில் பேசிய இயக்குநர் விக்னேஷ் சிவன், நடிகர் தனுஷுக்கும் தங்களுக்குமான உறவில் விரிசல் ஏற்பட்டது தனது வாழ்க்கையின் மிகப்பெரிய இழப்பு என்று வருத்தத்துடன் தெரிவித்துள்ளார். தனுஷின் பிறந்தநாளான ஜூலை 28-ம் தேதியே தனது தந்தையும் மறைந்ததால், தனுஷை ஒரு தந்தை போன்ற உருவமாகவே தான் பார்த்து வந்ததாக அவர் நெகிழ்ச்சியுடன் குறிப்பிட்டார். இவ்வளவு நெருக்கமாக இருந்த ஒரு நட்பு இன்று சிதைந்து போயிருப்பது தங்களுக்குப் பெரும் வேதனையளிப்பதாக அவர் கூறியுள்ளார்.

தனுஷ் தயாரிப்பில் உருவான ‘நானும் ரவுடி தான்’ திரைப்படத்தின் போது விக்னேஷ் சிவன் மற்றும் நயன்தாரா இடையே காதல் மலர்ந்தது. இருப்பினும், அந்தத் திரைப்படத்தின் சில காட்சிகளை நயன்தாராவின் திருமண ஆவணப்படத்தில் பயன்படுத்த தனுஷ் அனுமதி மறுத்ததும், அதற்கு 10 கோடி ரூபாய் நஷ்டஈடு கேட்டு சட்ட ரீதியான நோட்டீஸ் அனுப்பியதும் பெரும் சர்ச்சையை ஏற்படுத்தியது. இது குறித்துப் பேசிய விக்னேஷ் சிவன், எங்கோ ஒரு இடத்தில் தவறு நடந்துவிட்டதாகவும், இது போன்ற ஒரு சூழல் உருவானது மிகுந்த வெட்கத்திற்குரிய விஷயம் என்றும் குறிப்பிட்டுள்ளார்.

தனுஷுடன் இருந்த பிணக்கு இன்னும் முழுமையாகத் தீரவில்லை என்றாலும், விக்னேஷ் சிவன் அவர் மீதுள்ள மரியாதையை விட்டுக்கொடுக்கவில்லை. தனது ஆரம்பகால வளர்ச்சிக்கு தனுஷ் மிக முக்கியமான நபர் என்பதை அவர் நன்றியுடன் நினைவு கூர்ந்துள்ளார். ‘விஐபி’ படப்பிடிப்பின் போது இரண்டு ஆண்டுகள் அவருடன் இருந்த தருணங்களையும், அவர் சாப்பிட்ட பிறகுதான் தான் சாப்பிடுவேன் என்ற அளவிற்கு இருந்த நெருக்கத்தையும் குறிப்பிட்டு, இந்த கசப்பான சம்பவங்கள் ஒருநாள் மாறி மீண்டும் சுமுகமான சூழல் ஏற்படும் என்ற நம்பிக்கையை அவர் வெளிப்படுத்தியுள்ளார்.