“மே 30-ல் மட்டும் 5,000 பேர் ஓய்வு…”அரசு வேலைக்காகக் காத்திருக்கும் லட்சக்கணக்கான இளைஞர்களுக்குப் பெரு நற்செய்தி? குரூப் தேர்வுகள்… ஆசிரியர் நியமனத்தில் வரப்போகும் மெகா அப்டேட்!”

தமிழக அரசின் பல்வேறு துறைகள், பொதுத்துறை நிறுவனங்கள், உள்ளாட்சி அமைப்புகள் மற்றும் கல்வித் துறைகளில் மொத்தம் 12 லட்சத்திற்கும் அதிகமான பணியிடங்கள் உள்ளன. தமிழகத்தில் அரசு ஊழியர்கள் மற்றும் ஆசிரியர்களுக்கான ஓய்வு வயது 60 ஆக உள்ள நிலையில், ஆண்டுதோறும் மே மாதத்தின் கடைசி நாளில் அதிகளவிலான ஊழியர்கள் ஓய்வு பெறுவது வழக்கமாக உள்ளது. அந்த வகையில், கடந்த ஆண்டு மே 31-ல் 8,144 பேர் ஓய்வு பெற்றதைத் தொடர்ந்து, இந்த ஆண்டும் மே மாதத்தின் கடைசிப் பணிநாளான நேற்று முன்தினம் (மே 30) ஒரே நாளில் 5 ஆயிரத்திற்கும் மேற்பட்ட அரசு ஊழியர்கள் மற்றும் ஆசிரியர்கள் பணி ஓய்வு பெற்றுள்ளதாகத் தகவல் வெளியாகியுள்ளது. இந்த புதிய ஓய்வுகளால் ஏற்கனவே பற்றாக்குறையுடன் இயங்கி வந்த அரசுத் துறைகளில் காலியிடங்களின் எண்ணிக்கை மேலும் அதிகரித்துள்ளது.

தமிழக அரசுத் துறைகளில் கடந்த இருபது ஆண்டுகளாகப் பணியில் இணைந்த பலர் தற்போது ஓய்வு வயதை எட்டியிருப்பதால், அடுத்த சில ஆண்டுகளிலும் இதே போன்ற பெருமளவிலான ஓய்வுகள் தொடரும் என அதிகாரிகள் கணிக்கின்றனர். இந்தத் தொடர் ஓய்வுகளின் காரணமாக, தமிழக அரசின் ஒட்டுமொத்த காலிப்பணியிடங்களின் எண்ணிக்கை தற்போது 5 லட்சத்தைத் தாண்டியுள்ளதாக அதிர்ச்சித் தகவல் வெளியாகியுள்ளது. அதாவது, மொத்த பணியிடங்களில் சுமார் 41 சதவீதத்திற்கும் அதிகமான இடங்கள் காலியாக இருப்பது பெரும் கவலைக்குரிய விஷயமாகப் பார்க்கப்படுகிறது. இதனால் பல அரசு அலுவலகங்களில் இருக்கும் ஊழியர்கள், இரண்டு அல்லது மூன்று பேரின் பணிகளைச் சேர்த்து கவனிக்க வேண்டிய இக்கட்டான நிலைக்குத் தள்ளப்பட்டுள்ளனர்.

அரசுத் துறைகளின் தினசரி செயல்பாடுகள், மக்கள் சேவைகள் மற்றும் நலத்திட்ட அமலாக்கம் ஆகியவை நேரடியாக மனிதவளத்தைச் சார்ந்தே இயங்குகின்றன. குறிப்பாகப் பள்ளிக்கல்வி, சுகாதாரம், வருவாய் நிர்வாகம், காவல்துறை மற்றும் உள்ளாட்சி நிர்வாகம் போன்ற மிக முக்கியத் துறைகளில் ஏற்பட்டுள்ள இந்த அதீத பணியாளர் பற்றாக்குறையால், பொதுமக்களுக்கு வழங்கப்படும் அத்தியாவசிய சேவைகள் கடுமையாகப் பாதிக்கப்படும் அபாயம் எழுந்துள்ளது. ஒவ்வொரு ஆண்டும் சராசரியாக 50 ஆயிரம் பணியிடங்கள் ஓய்வு உள்ளிட்ட காரணங்களால் காலியானாலும், அவற்றில் மிகக் குறைந்த அளவே புதிய நியமனங்கள் மூலம் நிரப்பப்படுவதால் நிர்வாகச் சிக்கல்கள் ஆண்டுதோறும் அதிகரித்துக் கொண்டே செல்கின்றன.

மறுபுறம், இந்தத் தாமதம் அரசு வேலைக்காகப் பல ஆண்டுகளாகப் போட்டித் தேர்வுகளுக்குத் தயாராகி வரும் லட்சக்கணக்கான இளைஞர்களிடையே பெரும் ஏமாற்றத்தை ஏற்படுத்தி வருகிறது. இந்நிலையில், தமிழகத்தில் புதிய ஆட்சியை அமைத்துள்ள முதலமைச்சர் விஜய் தலைமையிலான தமிழக வெற்றிக் கழக அரசு, தேர்தல் காலத்தில் “அரசுத் துறைகளில் உள்ள காலிப்பணியிடங்கள் அனைத்தும் போர்க்கால அடிப்படையில் நிரப்பப்படும்” என்று அதிரடி வாக்குறுதி அளித்திருந்தது. எனவே, முதல்வர் விஜய் இந்த விவகாரத்தில் தலையிட்டு, ஆசிரியர் பணியிடங்கள், மருத்துவத் துறை காலியிடங்கள் மற்றும் டிஎன்பிஎஸ்சி குரூப் தேர்வுகள் மூலமான நிர்வாகப் பணியிடங்களை விரைவாக நிரப்ப புதிய அறிவிப்புகளை எப்போது வெளியிடுவார் என்ற பலத்த எதிர்பார்ப்பு வேலை தேடும் இளைஞர்களிடையே அதிகரித்துள்ளது.