“கஜானா காலியாக இருப்பது அவருக்கே இப்பதான் தெரியும்…” 6 மாசம் டைம் கொடுங்க…! முதல்வர் விஜய்க்கு ஆதரவாக குரல் கொடுத்த மதிமுக பொதுச்செயலாளர் வைக்கோ…!!

தஞ்சாவூரில் செய்தியாளர்களைச் சந்தித்த ம.தி.மு.க. பொதுச்செயலாளர் வைகோ, மேகதாது அணை விவகாரத்தில் மத்திய அரசுக்கு அழுத்தம் கொடுக்கச் சென்னையில் பல்வேறு அமைப்புகள் சார்பில் ஆர்ப்பாட்டம் நடைபெறவுள்ளதாகவும், விவசாயப் பிரச்சினைகளுக்காக வரும் 5-ஆம் தேதி தென்காசியில் உண்ணாவிரதப் போராட்டம் நடத்தப்படும் என்றும் தெரிவித்தார்.

தொடர்ந்து பேசிய அவர், தமிழக ஆளுநர் அர்லேகர் திருவள்ளுவருக்குக் காவி ஆடை போர்த்திய சனாதனச் செயலை எக்காரணம் கொண்டும் மன்னிக்க முடியாது என்றும், இது போன்ற திட்டமிட்ட ஆணவப் போக்குத் தொடர்ந்தால் ஆளுநர் செல்லும் இடமெல்லாம் ம.தி.மு.க. சார்பில் கருப்புக்கொடி காட்டப்படும் என்றும் எச்சரித்தார். மேலும், தமிழகத்தில் தற்போதைக்கு தி.மு.க. உடனான கூட்டணி தொடர்வதாகவும், உள்ளாட்சித் தேர்தல் நிலைப்பாடு குறித்துப் பின்னர் அறிவிக்கப்படும் என்றும் கூறினார்.

புதிதாகப் பொறுப்பேற்றுள்ள முதலமைச்சர் விஜய் குறித்துப் பேசிய வைகோ, அவர் ஆட்சிக்கு வந்து சில நாட்களே ஆவதால் தற்போதைக்கு அவரை யாரும் விமர்சிக்க வேண்டாம் என்றும், நிர்வாகத்திற்குள் சென்ற பிறகுதான் கஜானா காலியாக இருப்பது அவருக்கே தெரிந்திருக்கும் என்பதால் அவருக்கு 6 மாதங்கள் கால அவகாசம் வழங்க வேண்டும் என்றும் கேட்டுக்கொண்டார். அதே சமயம், முதல்வர் விஜய் செய்தியாளர்களைச் சந்திப்பதைத் தவிர்க்கக் கூடாது என்றும் வேண்டுகோள் விடுத்தார்.

இறுதியாக, மாநிலத்தில் போதைப்பொருள் நடமாட்டத்தை ஒழிக்க வேண்டும் என்றும், சிறுமிகளுக்கு எதிரான பாலியல் வன்கொடுமை மற்றும் கொலைக் குற்றங்களில் ஈடுபடுவோருக்குப் பிணை வழங்காமல் ஆயுள் தண்டனை விதிக்கும் வகையில் குற்றவியல் சட்டங்களைத் திருத்த மத்திய, மாநில அரசுகள் நடவடிக்கை எடுக்க வேண்டும் என்றும் அவர் வலியுறுத்தினார்.