“100-ல் ஒரு பங்கு கூட செய்ய முடியாது…”ஜூன் 4ல் உருகிய உலகநாயகன்…”பாலு இல்லாதது அந்த இடத்துல பெரிய வெற்றிடம்…”இளையராஜாவை வியக்க வைத்த ‘பாடும் நிலா’…எத்தனை பாடகர்கள் வந்தாலும் அவர் இடத்தைப் பிடிக்க முடியாது… எஸ்பிபி பிறந்தநாளில் வைரலாகும் ஆடியோ…

பாடும் நிலா’ என்று ஒட்டுமொத்த இந்தியத் திரை உலகினராலும், ரசிகர்களாலும் அன்போடு அழைக்கப்பட்ட மறைந்த மகா கலைஞர் எஸ்.பி.பாலசுப்பிரமணியம் அவர்களின் பிறந்த நாளான ஜூன் 4ஆம் தேதியை (இன்று), உலகம் முழுவதும் உள்ள அவரது ரசிகர்கள் நெகிழ்ச்சியோடு கொண்டாடி வருகிறார்கள். கொடிய கொரோனா பேரிடர் காலத்தில் அவர் நம்மைவிட்டுப் பிரிந்தாலும், தென்னிந்தியாவின் பட்டிதொட்டியெங்கும் உள்ள குக்கிராமங்கள் வரை அவருக்காக கண்ணீர் அஞ்சலி செலுத்தப்பட்ட நிகழ்வுகள், மக்கள் அவர் மீது வைத்திருந்த அளப்பரிய அன்பிற்குச் சான்றாகும். அவர் மறைந்தாலும் அவரது குரல் என்றும் அழியாமல் நம்முடனேயே வாழ்ந்து வரும் நிலையில், அவரது பிறந்தநாளை முன்னிட்டு திரையுலகின் இரு ஆளுமைகளான உலகநாயகன் கமல்ஹாசனும், இசைஞானி இளையராஜாவும் தங்களது எக்ஸ் (X) பக்கத்தில் நெகிழ்ச்சியான வாழ்த்துகளையும் புகழ் வணக்கத்தையும் செலுத்தியுள்ளனர்.

கமல்ஹாசன் தனது எக்ஸ் பக்கத்தில், “என் கரம் பற்றிய விரல், என் இசைக்கான குரல் அன்னையா எஸ்.பி.பாலசுப்ரமணியம் அவர்களின் பிறந்த நாள் இன்று. அவர் வாழ்க, குரலாக” என்று மிகவும் சுருக்கமாகவும், அதே சமயம் ஆழமான நட்புணர்வோடும் பதிவிட்டுள்ளார். திரையில் கமலின் நடிப்புக்கு பின்னணியில் எஸ்.பி.பியின் குரல் கொடுத்த மேஜிக் தமிழ் சினிமாவின் பொற்காலம் என்பதால், இந்த வரிகள் ரசிகர்களைப் பெரிதும் கவர்ந்துள்ளன. அதேபோல், எஸ்.பி.பியின் நீண்டகால நண்பரும் இசை மேதையுமான இளையராஜா, எஸ்பிபி குறித்த தனது நெகிழ்ச்சியான குரல் பதிவு ஒன்றை புகைப்படத்துடன் பகிர்ந்துள்ளார். அதில், “ஒரு கம்போசரோட மனசுல என்ன ஓடுதுன்னு எஸ்பிபி அளவுக்கு யாராலயும் அவ்ளோ சீக்கிரம் புரிஞ்சுக்க முடியாது; மைக் முன்னாடி நின்னுட்டாருன்னா, அந்தப் பாட்டுக்குள்ள அப்படியே ஜீவனைக் கொண்டு வந்து கொட்டிடுவாரு” என அவரது அர்ப்பணிப்பைப் பாராட்டியுள்ளார்.

இளையராஜா தனது குரல் பதிவில் மேலும் பேசுகையில், பாலு இல்லாமல் இருப்பது தனது மனதில் என்றும் நீங்காத ஒரு பெரிய வெற்றிடமாகவே உள்ளது என்று உருகியுள்ளார். அவருக்கு நிகரான குரல் யாருக்கும் இல்லை என்றும், அவரது குரலை யாராலும் காப்பி அடிக்க முடியாது என்றும் குறிப்பிட்ட அவர், ஒரு பாடல் வழியாக என்ன உணர்வு வெளிப்பட வேண்டுமோ, அதை மிகவும் கவனமாக வெளிக்கொண்டு வரும் அசாத்திய திறமை எஸ்.பி.பிக்கு மட்டுமே உரியது என்றார். ஒரு இசையமைப்பாளராகத் தான் எதிர்பார்ப்பதை விடவும் நேர்த்தியாகப் பாடலை முடித்துக் கொடுக்கும் வல்லமை படைத்தவர் பாலு என்றும், 50 ஆயிரம் பாடல்களைப் பாடி அவர் செய்துள்ள மகா சாதனையை இனி யாராலும் நெருங்கக் கூட முடியாது என்றும் புகழ்ந்துரைத்துள்ளார். இளையராஜா மற்றும் கமல்ஹாசன் ஆகிய இருவரின் இந்த உணர்வுப்பூர்வமான பதிவுகள் தற்போது சமூக வலைத்தளங்களில் வைரலாகி, எஸ்.பி.பி ரசிகர்களை நெகிழச் செய்து வருகிறது.