100 கோடி வசூல் சாதனை இயக்குநருடன் எஸ்டிஆர் …சிம்பு – அஸ்வத் மாரிமுத்து இடையே மோதலா?…வதந்திகளுக்கு முற்றுப்புள்ளி…ஏஜிஎஸ் அர்ச்சனா கல்பாத்தி உடைத்த அதிரடி உண்மை…!

தமிழ் திரையுலகில் தனது இரண்டாவது இன்னிங்ஸை மாபெரும் வெற்றிகளுடன் தொடங்கியுள்ள நடிகர் சிலம்பரசன் (STR), தற்போது அடுத்தடுத்த படங்களில் தீவிரமாக கவனம் செலுத்தி வருகிறார். வெங்கட் பிரபுவின் ‘மாநாடு’, கௌதம் மேனனின் ‘வெந்து தணிந்தது காடு’ ஆகிய திரைப்படங்களின் மாபெரும் வெற்றிக்குப் பிறகு, மணிரத்னத்தின் ‘தக் லைஃப்’ படத்திலும் நடித்து முடித்துள்ளார். அதனைத் தொடர்ந்து, ரசிகர்கள் நீண்ட நாட்களாக ஆவலோடு எதிர்பார்த்துக் காத்திருந்த இயக்குநர் வெற்றிமாறன் – சிம்பு கூட்டணியின் ‘அரசன்’ திரைப்படத்தின் இறுதிக்கட்டப் படப்பிடிப்பு தற்போது விறுவிறுப்பாக நடைபெற்று வருகிறது. வழக்கம் போல் இப்படத்தின் தயாரிப்பாளர் தரப்பிலும் சில பஞ்சாயத்துகள் ஏற்பட்டுப் பேச்சுவார்த்தைக்குப் பின் படப்பிடிப்பு தொடங்கினாலும், சிம்பு தரப்பிலிருந்து எந்தவொரு தாமதமும் இல்லை எனத் தயாரிப்பாளர் கலைப்புலி எஸ்.தாணுவே அதிகாரப்பூர்வமாகத் தெரிவித்துள்ளார்.

‘அரசன்’ படத்திற்கு இணையாக, ஏஜிஎஸ் என்டர்டெயின்மென்ட் தயாரிப்பில் ‘ஓ மை கடவுளே’ மற்றும் ‘டிராகன்’ ஆகிய நூறு கோடி வசூல் சாதனைப் படங்களைக் கொடுத்த இயக்குநர் அஸ்வத் மாரிமுத்து இயக்கத்திலும் சிம்பு ஒரு புதிய படத்தில் நடிக்க கமிட்டாகியிருந்தார். முதலில் அஸ்வத் மாரிமுத்துவின் படத்தில்தான் சிம்பு நடிப்பதாக இருந்தது; ஆனால், வெற்றிமாறன் படத்தின் வாய்ப்பு கிடைத்ததால் அப்படத்தின் தேதிகள் தள்ளி வைக்கப்பட்டன. மேலும், அஸ்வத் படத்திற்காக சிம்பு வளர்த்திருந்த கெட்டப்பையே ‘அரசன்’ படத்திற்கும் பயன்படுத்தி வருகிறார். இந்தச் சூழலில், படப்பிடிப்பு தள்ளிப் போவதால் சிம்புவிற்கும் இயக்குநர் அஸ்வத்திற்கும் இடையே கடுமையான மனஸ்தாபம் ஏற்பட்டுவிட்டதாகவும், இதனால் இப்படம் கைவிடப்பட வாய்ப்புள்ளதாகவும் கோலிவுட் வட்டாரத்தில் பரபரப்பான தகவல்கள் வெளியாகின.

இணையத்தில் காட்டுத்தீயாகப் பரவிய இந்த மோதல் வதந்திகளுக்கு முற்றுப்புள்ளி வைக்கும் வகையில், இப்படத்தின் தயாரிப்பாளர் அர்ச்சனா கல்பாத்தி தற்போது விளக்கமளித்துள்ளார். அவர்கள் இருவருக்கும் இடையே எந்தவொரு மோதலும் இல்லை என்று திட்டவட்டமாக மறுத்துள்ள அவர், சிம்பு தற்போது ‘அரசன்’ படத்தின் படப்பிடிப்பில் பிஸியாக இருப்பதும், அதே நேரத்தில் இயக்குநர் அஸ்வத் மாரிமுத்து இன்னும் திரைக்கதையை முழுமையாக இறுதி செய்யாமல் இருப்பதும் தான் படப்பிடிப்பு தாமதமாவதற்குக் காரணம் என்று கூறியுள்ளார். அஸ்வத் மற்றும் பிரதீப் ரங்கநாதன் போன்ற இளம் இயக்குநர்கள் தங்களது எழுத்தில் மிகவும் தெளிவாக இருப்பவர்கள் என்றும், அவர்கள் எழுதும் திரைக்கதையை அப்படியே திரையில் கொண்டு வரும் திறமை படைத்தவர்கள் என்றும் பாராட்டியுள்ள அர்ச்சனா கல்பாத்தி, இவர்களிடம் இருந்து தானும் பல விஷயங்களைக் கற்றுக் கொள்வதாக நெகிழ்ச்சியுடன் தெரிவித்துள்ளார்.