ஏ.ஆர்.ரஹ்மான் உடைத்த அந்த 90ஸ் மரபு…”வானும் நீலமும் பிரிந்தது போல…” மீண்டும் இணைவார்களா ரஹ்மான் – வைரமுத்து?…25 வருடங்களுக்குப் பின் அம்பலமான உண்மை…!

தமிழ் திரையிசையின் பொற்காலக் கூட்டணிகளில் ஏ.ஆர்.ரஹ்மான் – வைரமுத்து காம்போவிற்கு எப்போதும் தனித்துவமான இடமுண்டு. 1999-ல் பிரசாந்த், சிம்ரன் நடிப்பில் வெளியாகி சூப்பர் ஹிட்டான ‘ஜோடி’ திரைப்படத்தின் பாடல்கள் இதற்கு மிகச்சிறந்த உதாரணம். குறிப்பாக, இன்றும் பல தலைமுறைகளைக் கடந்து ரசிகர்களின் நெஞ்சங்களை ஆக்கிரமித்திருக்கும் ‘காதல் கடிதம் தீட்டவே’ பாடல் ஒரு காலமற்ற காவியம். மேகத்தைக் காகிதமாக்கி, வானின் நீலத்தைத் மையாக்கி, சூரிய சந்திரர்களை அஞ்சல்காரர்களாக்கும் வைரமுத்துவின் பிரம்மாண்ட வரிகளுக்கு, ரஹ்மான் தன் அசாத்திய இசையால் அமைதியான முறையில் உயிர்கொடுத்து, கேட்பவர்களை வேறு ஒரு உலகத்திற்கே அழைத்துச் சென்றிருப்பார்.

பெரும்பாலோர் இப்பாடலை தமிழில்தான் முதலில் உருவானது என்று நினைத்துக் கொண்டிருக்கிறார்கள். ஆனால், உண்மை என்னவென்றால், இதற்கு முன்பே ஜோதிகா, அக்ஷய் கண்ணா நடிப்பில் ஹிந்தியில் வெளியான ‘டோலி சஜா கே ரக்னா’ (Doli Saja Ke Rakhna) திரைப்படத்திற்காக ரஹ்மான் அமைத்த ட்யூன்தான் இது. 90-களில் ஏற்கனவே பயன்படுத்திய ஒரு மெட்டை மீண்டும் பயன்படுத்துவது என்பது இசையமைப்பாளர்கள் மத்தியில் அரிதான ஒன்று. ஆனால், ரஹ்மான் அத்தகைய மரபுகளை உடைத்து, ஹிந்தியில் கவனம் பெறத் தவறிய ஒரு நல்ல இசை வடிவம் தமிழ் ரசிகர்களையும் சென்றடைய வேண்டும் என்ற நோக்கில் இதை ‘ஜோடி’ படத்தில் பயன்படுத்தினார். இதேபோல் தான் ‘ரோஜா’ படத்தின் இசைத்துணுக்கை ‘இந்தியன்’ படத்தின் ‘டெலிஃபோன் மணிபோல்’ பாடலில் பயன்படுத்தி மேஜிக் செய்திருப்பார்.

தமிழ் மொழியின் மீதான பற்றும், புதுமைகளைப் புகுத்தும் ஆர்வமும் கொண்ட இந்த இரு துருவங்கள் இணைந்தபோது, கொலம்பஸைக் கோடம்பாக்கத்திற்கும், கிராமத்துப் பாட்டியை டிஸ்னிலேண்டிற்கும் அழைத்து வரும் வித்தைகள் சாத்தியமாயின. ஹிந்தியில் ரஹ்மான் உருவாக்கிய பல அற்புதமான மெட்டுகள், வைரமுத்துவின் தமிழ் வரிகளால் ‘காதல் கடிதம் தீட்டவே’, ‘எங்கே என் புன்னகை’ எனத் தமிழில் ரீமேக் செய்யப்பட்டு மாபெரும் வெற்றியடைந்தன. துரதிர்ஷ்டவசமாக இன்று இக்கூட்டணி பிரிந்திருப்பது இசை ரசிகர்களுக்குப் பெரும் ஏமாற்றமே. வானும் நீலமும் பிரிந்திருப்பது போன்ற இந்த இடைவெளி முடிவுக்கு வந்து, அவர்கள் மீண்டும் இணைந்து தமிழ் திரையுலகிற்கு மேலும் பல ‘இசைக் கடிதங்களை’ தீட்ட வேண்டும் என்பதே ஒட்டுமொத்த ரசிகர்களின் எதிர்பார்ப்பு.