ஒவ்வொரு நாளும் வெளியாகும் போட்டோஸ்… இதன் பின்னணியில் இருக்கும் ‘தி ரூட்’ ரகசியம்…தொண்டர்களுக்கு நோ… சினிமாக்காரர்களுக்கு எஸ்… கோட்டையில் நடக்கும் முதல்வர் விஜய்யின் அதிரடி சந்திப்புகள்…ரூட் ஜெகதீஷின் மெகா பிளான்..!

 தமிழகத்தில் தவெக ஆட்சி அமைந்து முதலமைச்சராக விஜய் பொறுப்பேற்றுள்ள நிலையில், கோட்டையிலும் அவரது இல்லத்திலும் அரங்கேறி வரும் தொடர் சந்திப்புகள் தற்போதைய அரசியல் மற்றும் சினிமா வட்டாரங்களில் மிகப்பெரிய விவாதப் பொருளாக மாறியுள்ளன. முதலமைச்சராகப் பதவியேற்றது முதல், பொதுமக்கள் மற்றும் கட்சியின் அடிமட்டத் தொண்டர்கள் அவரை எளிதில் அணுகலாம் என்று பரவலாக எதிர்பார்க்கப்பட்டது. ஆனால், கட்சியின் வெற்றிக்காகத் தேர்தல் களத்தில் இரவு பகலாக உழைத்த தவெகவின் மாவட்ட நிர்வாகிகளும், சாமானிய மக்களும் கூட தங்களின் தலைவரைச் சந்தித்து வாழ்த்துப் பெற முடியாமல் தவித்து வருவதாக உள்கட்சி வட்டாரங்களிலேயே சலசலப்பு ஏற்பட்டுள்ளது. இதற்கு நேர்மாறாக, விஜய் தினந்தோறும் சினிமா துறையைச் சேர்ந்த நட்சத்திரங்களையும், இயக்குநர்களையும் மட்டுமே சந்தித்து புகைப்படம் எடுத்து வருவது பெரும் விவாதத்தைக் கிளப்பியுள்ளது.

 சினிமா நட்சத்திரங்கள் தினந்தோறும் வரிசையாக வந்து முதலமைச்சர் விஜய்யைச் சந்திப்பதன் பின்னணியில், ‘ரூட்’ ஜெகதீஷ் பழனிசாமி இருந்து வருவதாக விவரம் அறிந்தவர்கள் கூறுகின்றனர். சினிமா துறையில் தனது தனிப்பட்ட செல்வாக்கையும் ஆதிக்கத்தையும் தொடர்ந்து தக்கவைத்துக்கொள்ள ஜெகதீஷ் முயல்வதாகக் கூறப்படுகிறது. இதற்காகவே, தனது ‘தி ரூட்’ (The Route) நிறுவனத்தின் மூலம் பல்வேறு சினிமா பிரபலங்களை ஒருங்கிணைத்து, தினந்தோறும் அவர்கள் விஜய்யைச் சந்திப்பதற்கான ஏற்பாடுகளை அவர் முன்னின்று செய்து வருகிறார். அரசியல் ரீதியாகப் பொதுமக்களைச் சந்திப்பதை விட, சினிமா நட்சத்திரங்களின் சந்திப்புகள் மூலம் முதலமைச்சரை எப்போதும் சமூக வலைதளங்களில் டிரெண்டிங்கில் வைத்திருக்க ஜெகதீஷின் டிஜிட்டல் குழு திட்டமிட்டுச் செயல்படுவதாகவும் ஒரு தரப்பினர் குற்றம் சாட்டுகின்றனர்.

 இப்படி முதலமைச்சரைச் சந்திக்க வைப்பதன் மூலமாக, தனது ‘தி ரூட்’ நிறுவனத்தில் இன்னும் பல புதிய நட்சத்திரங்களை இணைக்க முடியும் என்று ஜெகதீஷ் நம்புவதாகத் திரைத்துறை வட்டாரங்கள் தெரிவிக்கின்றன. இந்த நிறுவனம் சினிமா நட்சத்திரங்களுக்கு மேனேஜராகச் செயல்படுவது மட்டுமன்றி, அவர்களின் சோசியல் மீடியா பக்கங்களையும் முழுமையாகக் கையாண்டு வருகிறது. நட்சத்திரங்கள் என்ன பேச வேண்டும், எந்த நிகழ்ச்சியில் பங்கேற்க வேண்டும், என்ன மாதிரியான புகைப்படங்களைப் பதிவிட வேண்டும் என்பது வரை அனைத்தையும் இந்த நிறுவனமே தீர்மானிக்கிறது. ஏற்கனவே தயாரிப்புத் துறையிலும் கால் பதித்துவிட்ட ‘தி ரூட்’ நிறுவனம், முதலமைச்சருடனான இந்தத் தொடர் சந்திப்புகள் மூலம் வரும் நாட்களில் சினிமா மற்றும் டிஜிட்டல் சந்தையில் மேலும் அசுர வளர்ச்சியடையக் கூடும் என்று பார்க்கப்படுகிறது.