நான் அதிமுகவில் இருக்கேனா..? இல்லையா..? அண்ணன் EPS கிட்ட கேளுங்க… பாவம் அவரே கன்பியூஸ் ஆகிட்டாரு… திடீர் டுவிஸ்ட் வைத்த சி.வி சண்முகம்..!!

விழுப்புரம் திண்டிவனத்தில் நேற்று செய்தியாளர்களைச் சந்தித்த அதிமுக முன்னாள் அமைச்சர் சி.வி.சண்முகம், “நான் அதிமுகவில் இருக்கிறேனா இல்லையா என எனக்கே தெரியவில்லை; எடப்பாடி பழனிசாமியிடம் கேட்டுச் சொல்லுங்கள்” என்று நகைச்சுவையாகவும் அதே சமயம் பரபரப்பாகவும் பதிலளித்துள்ளார். கடந்த சில நாட்களாக அவர் கட்சி நடவடிக்கைகளில் இருந்து விலகி இருப்பதாக எழுந்த அரசியல் வதந்திகளுக்கு மத்தியில் இந்த கருத்து வெளியாகியுள்ளது. ஒரு வார இடைவெளிக்குப் பிறகு தான் இன்று வீட்டிற்குத் திரும்பியதால், தனது ஆதரவாளர்கள் மற்றும் தொண்டர்கள் தன்னை வந்து சந்தித்ததாக அவர் விளக்கமளித்தார்.

சி.வி.சண்முகத்தின் இந்தத் திடீர் கருத்து தமிழக அரசியல் வட்டாரத்திலும், குறிப்பாக அதிமுக தொண்டர்கள் மத்தியிலும் பெரும் அதிர்வலைகளை ஏற்படுத்தியுள்ளது. கட்சித் தலைமைக்கும் அவருக்கும் இடையே ஏதேனும் அதிருப்தி நிலவுகிறதா என்ற விவாதங்களை இந்த பேச்சு கிளப்பியுள்ளது. எனினும், தனது ஆதரவாளர்கள் சந்திப்பு என்பது ஒரு சாதாரணமான நிகழ்வுதான் என்றும், அதற்கு அரசியல் அர்த்தங்கள் கற்பிக்கத் தேவையில்லை என்றும் அவர் தனது பேட்டியில் மறைமுகமாகக் குறிப்பிட்டுள்ளார்.