இனி ஆட்டம் வேற லெவல்.. அதிமுக நிர்வாகிகளுக்கு இபிஎஸ் போட்ட ‘புது ஸ்கெட்ச்’… கசிந்த பரபரப்பு தகவல்..!!

தமிழக சட்டப்பேரவைத் தேர்தல் தோல்விக்குப் பிறகு, அ.தி.மு.க.வை மறுசீரமைக்கவும் எதிர்கால அரசியல் செயல்திட்டங்களை வகுக்கவும் கட்சியின் பொதுச்செயலாளர் எடப்பாடி பழனிசாமி தீவிர நடவடிக்கைகளில் ஈடுபட்டுள்ளார். சென்னை ராயப்பேட்டையில் உள்ள கட்சியின் தலைமை அலுவலகத்தில், மாவட்ட வாரியாக நிர்வாகிகளை நேரில் சந்தித்து அவர் தொடர் ஆலோசனைக் கூட்டங்களை நடத்தி வருகிறார். இக்கூட்டங்களில் கட்சியின் வாக்கு நிலவரம், நிர்வாக அமைப்பைப் பலப்படுத்துதல் மற்றும் தொண்டர்களின் செயல்பாடுகளைத் தீவிரப்படுத்துவது உள்ளிட்ட பல்வேறு முக்கிய அம்சங்கள் குறித்து விரிவாக விவாதிக்கப்பட்டு வருகிறது.

நேற்று நடைபெற்ற ராணிப்பேட்டை, திருப்பத்தூர் மற்றும் திருவள்ளூர் மாவட்ட நிர்வாகிகளுடனான கூட்டத்தில் பேசிய எடப்பாடி பழனிசாமி, கட்சிக்குத் துரோகம் செய்துவிட்டு விலகிச் செல்பவர்களைப் பற்றி யாரும் கவலைப்படத் தேவையில்லை என்று குறிப்பிட்டார். அ.தி.மு.க. என்பது தொண்டர்களின் உழைப்பாலும் அர்ப்பணிப்பாலும் உருவான இயக்கம் என்பதால், எந்த சக்தியாலும் இதைச் சிதைக்க முடியாது என்றும், இந்த இயக்கத்தை பலவீனப்படுத்த முயன்றவர்கள் அரசியல் வரலாற்றில் நிலைத்து நின்றதில்லை என்றும் அவர் சாடினார். மேலும், தேர்தல் தோல்வியில் இருந்து தொண்டர்கள் விரைவாக மீண்டு புதிய உற்சாகத்துடன் பணியாற்ற வேண்டும் எனவும், இனி வரும் தேர்தல்களில் வெற்றி நமதே என்றும் அவர் நம்பிக்கை ஊட்டினார்.

இந்தத் தொடர் ஆலோசனையின் அடுத்த கட்டமாக, இன்று திருச்சி மற்றும் நெல்லை மாவட்ட நிர்வாகிகளுடன் எடப்பாடி பழனிசாமி ஆலோசனையில் ஈடுபட்டுள்ளார். குறிப்பாக, திருச்சி கிழக்கு தொகுதி இடைத்தேர்தல் முடிவுகள், தோல்விக்கான காரணங்கள் மற்றும் எதிர்கால தேர்தல் வியூகங்கள் குறித்து இக்கூட்டங்களில் விரிவாக விவாதிக்கப்படுகிறது. சட்டப்பேரவைத் தேர்தல் முடிவுகளுக்குப் பிறகு, அ.தி.மு.க.வின் முன்னாள் அமைச்சர்கள் மற்றும் முக்கிய நிர்வாகிகள் பலர் த.வெ.க.வில் இணைந்து வருவது கட்சிக்கு ஒரு சவாலான சூழலை உருவாக்கியுள்ள பின்னணியில், நிர்வாகிகளுக்கு நம்பிக்கையையும் புதிய உற்சாகத்தையும் அளிக்கும் நோக்கில் இந்தத் தொடர் ஆலோசனைகள் மேற்கொள்ளப்பட்டு வருகின்றன.