“எடப்பாடியார் வேற ரகம்… விஜய் வெறும் படம்..!” மதுரையில் அதிமுக போட்ட அதிரடி போடு..!!!

மதுரையில் செய்தியாளர்களைச் சந்தித்த அதிமுகவின் மூத்த தலைவரும் முன்னாள் அமைச்சருமான ஆர்.பி. உதயகுமார், தமிழக முதலமைச்சர் விஜய் மற்றும் அவரது தவெக அரசுக்கு எதிராகக் கடுமையான அரசியல் விமர்சனங்களை முன்வைத்துள்ளார். முதலமைச்சர் விஜய்யின் குணம் அதிமுக பொதுச்செயலாளர் எடப்பாடி பழனிசாமியிடம் இல்லை என்பதைத் தாங்கள் முழு மனதோடு ஏற்றுக் கொள்வதாக அவர் குறிப்பிட்டுள்ளார்.

இதற்கு விளக்கமளித்த அவர், முதலமைச்சர் விஜய் பேசுவதெல்லாம் வெறும் சினிமா பாணி வசனங்கள் மற்றும் வெற்றுத் தம்பட்டங்கள் மட்டுமே என்றும், ஆனால் எடப்பாடி பழனிசாமி 50 ஆண்டுகால அரசியல் அனுபவமும், பக்குவமும், நிதானமும் கொண்ட ஒரு தேர்ந்த மக்கள் தலைவர் என்றும் கூறினார். இதனால் இருவரின் குணங்களையும் ஒருபோதும் ஒன்றாக ஒப்பிட முடியாது என அவர் சுட்டிக்காட்டினார்.

மேலும், தூய்மையான நிர்வாகத்தைத் தருவதாகக் கூறி ஆட்சிக்கு வந்த தவெக அரசு, தற்பொழுது அரசு வழக்கறிஞர்கள் நியமனம் உள்ளிட்ட பல்வேறு முறைகேடு புகார்களில் சிக்கியுள்ளதாகக் குற்றம் சாட்டினார். தமிழகத்தில் சட்டம் ஒழுங்குச் சீர்கேடு, மின்சாரக் கட்டண உயர்வு, காவிரி விவகாரம் போன்றவற்றால் மக்கள் அவதிப்படுவதாகவும், கட்சித் தாவல் நடவடிக்கைகளை நம்பி தவெக செய்யும் அரசியல் நீண்ட காலம் நீடிக்காது என்றும், எடப்பாடியாரின் தலைமையில் அதிமுக வரவிருக்கும் உள்ளாட்சித் தேர்தலில் மாபெரும் வெற்றி பெறும் என்றும் ஆர்.பி. உதயகுமார் ஆணித்தரமாகத் தெரிவித்தார்.