“அங்கிள், ப்ளீஸ்.. ஒரே ஒரு 10 நிமிஷம் மட்டும் எனக்கு அப்பாவா வர்றீங்களா?”.. பள்ளி சிறுவனின் ஏக்கமும், கலங்க வைக்கும் பின்னணியும்.. வைரல் வீடியோ..!

வெறும் 10 நிமிடங்களுக்கு மட்டுமே அந்தச் சிறுவன் ‘அப்பா’ என்ற உறவைக் கடனாகக் கேட்டுள்ளான். சமூக வலைத்தளங்களில் வைரலாகி வரும் இந்த வீடியோ, பார்ப்பவர் எவரையும் ஒரு நிமிடம் நெஞ்சை உலுக்கி, சிந்திக்க வைக்கக் கூடியதாக அமைந்துள்ளது. தனது பள்ளியில் நடைபெறவிருந்த பெற்றோர்-ஆசிரியர் கூட்டத்தில் கலந்துகொள்வதற்காக, அந்தப் பகுதியில் பைக்கில் சென்ற ஒரு அந்நிய நபரை அந்தச் சிறுவன் நிறுத்தியுள்ளான்.

அவரிடம், “அங்கிள், ப்ளீஸ்.. ஒரே ஒரு 10 நிமிஷம் மட்டும் எனக்கு அப்பாவா வர்றீங்களா?” என்று அந்தப் பச்சிளம் குழந்தை ஏக்கத்துடன் கேட்டுள்ளது. பொம்மைகளையும், விளையாட்டுகளையும் கேட்டு அடம் பிடிக்க வேண்டிய ஒரு பிஞ்சு வயதில், ஒரு குழந்தை தனது தந்தையின் துணையை வெளியில் பிறரிடம் கடனாகக் கேட்கும் நிலை ஏற்பட்டுள்ளது ஒட்டுமொத்த சமூகத்தின் மீதான பெரும் கேள்வியாக எழுந்துள்ளது.

இந்த வீடியோ ஒருவேளை உண்மையாக இருக்கும் பட்சத்தில், இது வெறும் உணர்ச்சிப்பூர்வமான கதை மட்டுமல்ல; சூழ்நிலைகளின் காரணமாகவோ அல்லது குடும்பப் பிரிவினையின் காரணமாகவோ பெற்றோரின் அன்பும் துணையும் கிடைக்காமல் தவிக்கும் லட்சக்கணக்கான குழந்தைகளின் நிஜமான வலியைப் பிரதிபலிக்கிறது. எல்லா குழந்தைகளுக்கும் விலையுயர்ந்த பொம்மைகளோ, ஆடம்பரமான வாழ்க்கையோ தேவைப்படுவதில்லை; அவர்களுக்குத் தேவையெல்லாம் தங்களது பெற்றோரிடம் இருந்து கிடைக்கக்கூடிய கொஞ்ச நேரமும், அவர்களது அரவணைப்பும், உண்மையான அன்பும் மட்டுமே என்பதை இந்தச் சம்பவம் உணர்த்துகிறது.