பெண் வேடத்தில் நள்ளிரவில் சுற்றிய ஆண்.. 2 மணி நேரத்தில் அரங்கேறிய அதிர்ச்சி சம்பவம்… பெண்களின் பாதுகாப்பு நிலவரத்தை தோலுரித்த வைரல் வீடியோ..!!

புதுடெல்லியில் பெண்களின் இரவு நேரப் பாதுகாப்பைச் சோதிப்பதற்காக, ‘BeJaintle’ என்ற ஆண் உள்ளடக்கப் படைப்பாளர் பெண் வேடமிட்டு இருசக்கர வாகனத்தில் பயணித்த சமூகப் பரிசோதனை வீடியோ இணையத்தில் வைரலாகி வருகிறது. முகத்தை துப்பட்டாவால் மூடிக்கொண்டு சுமார் இரண்டு மணி நேரம் டெல்லி சாலைகளில் அவர் வலம் வந்தபோது, ஆண்கள் பலரும் அவரைத் தொடர்ந்து நோட்டமிட்டதோடு, சிலர் பின்தொடரவும் முயன்றுள்ளனர். 1.7 கோடிக்கும் அதிகமான பார்வைகளைப் பெற்றுள்ள இந்த வீடியோ, டெல்லியில் பெண்களின் பாதுகாப்பு குறித்த விவாதத்தை மீண்டும் உலுக்கியுள்ளது.\

https://www.instagram.com/reel/DdWhNe0z3DF/?utm_source=ig_web_button_share_sheet

தனது பயணத்தின்போது தான் எதிர்கொண்ட சம்பவங்கள் தன்னை ஆழமாக உலுக்கியதாக அந்த இளைஞர் தெரிவித்துள்ளார். வீட்டை விட்டு வெளியில் வந்த சில நிமிடங்களிலேயே ஆண்கள் முறைத்துப் பார்க்கத் தொடங்கியதாகவும், எரிபொருள் நிரப்பும் நிலையத்திலும் இதே நிலை நீடித்ததாகவும் அவர் குறிப்பிட்டுள்ளார். மேலும், சில ஆட்டோ ஓட்டுநர்கள் அவரது வாகனத்தை மறிக்கும் வகையில் ஆபத்தாக ஓட்டியதோடு, நண்பர்கள் வீடியோ எடுப்பதைக் கண்ட பிறகே அங்கிருந்து நகர்ந்ததாகக் குற்றம் சாட்டியுள்ளார். பின்தொடர்தல்கள் அதிகரித்ததால் அச்சமடைந்த அவர், பரிசோதனையை பாதியிலேயே நிறுத்திக்கொண்டார்.

இந்த கசப்பான அனுபவத்திற்குப் பிறகு, “பெண்கள் இரவில் தனியாக வெளியே செல்வது பாதுகாப்பானது அல்ல; அவர்களின் வாழ்க்கை மிகவும் கடினமானது” என்று அவர் வேதனையுடன் பகிர்ந்துள்ளார். இந்த வீடியோவின் பின்னூட்டங்களில் பல பெண் நெட்டிசன்கள், இதுவே தங்களின் தினசரி யதார்த்தம் என்று ஆதங்கத்தை வெளிப்படுத்தி வருகின்றனர். ஒரு ஆணின் மூலம் வெளிவந்துள்ள இந்த உண்மைப் பதிவு, பொது இடங்களில் பெண்களுக்குத் தேவையான பாதுகாப்பு மற்றும் சமூக மாற்றத்தின் அவசியத்தை வலியுறுத்துவதாக அமைந்துள்ளது.