“நானும் ஒரு குற்றவாளிதான்!” கோவையில் அண்ணாமலை கொடுத்த அதிரடி வாக்குமூலம்.. தனிநபர் வழிபாட்டு அரசியல் உடையுமா..?

கோவை நகரில் நடைபெற்ற ‘வி தி லீடர்ஸ்’ அமைப்பின்டாக்டர் ஏ.பி.ஜே. அப்துல் கலாம் நெறிமுறைகள் மற்றும் அரசியல் மைய தொடக்க விழாவில் பேசிய அண்ணாமலை, தமிழக மற்றும் தேசிய அரசியலில் நிலவி வரும் ‘கல்ட் பாலிடிக்ஸ்’ எனப்படும் தனிநபர் வழிபாட்டு அரசியல் முற்றிலும் உடைக்கப்பட வேண்டும் என்று வலியுறுத்தியுள்ளார். ஒரு குறிப்பிட்ட தலைவரையோ அல்லது அரசியல் இயக்கத்தையோ எந்தவித விமர்சனங்களுக்கும் அப்பாற்பட்டு, கண்மூடித்தனமாகப் போற்றிப் புகழ்வதே இந்த கல்ட் பாலிடிக்ஸ் கலாச்சாரம் என்று அவர் சுட்டிக்காட்டினார். இந்த தனிநபர் வழிபாட்டு முறை மாறினால் மட்டுமே நாட்டில் ஒரு ஆரோக்கியமான மற்றும் முற்போக்கான அரசியல் சூழல் உருவாகும் என்றும் அவர் தனது உரையில் குறிப்பிட்டார்.

இந்த அரசியல் கலாச்சாரம் குறித்து மிகவும் வெளிப்படையாகப் பேசிய அண்ணாமலை, “கல்ட் பாலிடிக்ஸில் நானும் விதிவிலக்கல்ல; இதிலே நானும் ஒரு குற்றவாளிதான்” என்று பகிரங்கமாக ஒப்புக்கொண்டார். தற்போதைய அரசியல் சூழலில் இந்த அலையிலிருந்து தப்பிப்பது கடினம் என்றாலும், தன்னால் முடிந்தவரை அத்தகைய தனிநபர் வழிபாட்டு அரசியல் போக்குகளைத் தவிர்த்து வருவதாகவும் அவர் தெரிவித்தார். மாநிலத்தில் மட்டுமல்லாது மத்தியிலும் இந்த கல்ட் கலாச்சாரத்தை மாற்றுவதே தனது முக்கிய நோக்கம் என்றும், அதற்குத் தான் ஒரு முன்னுதாரணமாகத் திகழ விரும்புவதாகவும் அவர் கூறினார்.

அரசியல் பதவிகளோ அல்லது அதிகார நாற்காலிகளோ யாருக்கும் நிரந்தரமானவை அல்ல என்று குறிப்பிட்ட அவர், சாதாரண அடித்தட்டு மக்களின் குரலை பிரதிபலிக்கும் ‘சாமானிய மக்களுக்கான அரசியலை’ முன்னெடுப்பதே தற்போதைய தேவை என்றார். இந்த கல்ட் பாலிடிக்ஸ் மற்றும் வாரிசு அரசியலுக்கு முற்றுப்புள்ளி வைத்து, தகுதிவாய்ந்த புதிய தலைவர்களை உருவாக்குவதற்காகவே கோவையில் இந்த புதிய பயிற்சி மையம் தொடங்கப்பட்டுள்ளதாகத் தெரிவித்த அவர், இதன் மூலம் அரசியல் மாற்றத்திற்கான அடித்தளம் அமைக்கப்படும் என்ற நம்பிக்கையையும் வெளிப்படுத்தினார்.