நம்பவே முடியல…! இறந்தவர்களின் சாம்பலில் சூப்… குடும்பமாக குடிக்கும் விசித்திர பழங்குடியினர்..! இதன் பின்னணி காரணம் என்ன..?!

தென் அமெரிக்காவில் உள்ள வெனிசுலா மற்றும் பிரேசில் எல்லைகளில் அமைந்துள்ள அமேசான் மழைக்காடுகளில் வாழும் யனோமாமி பழங்குடி இன மக்கள் மிகவும் விசித்திரமான மற்றும் தனித்துவமான இறுதி சடங்கு முறையைக் கடைபிடித்து வருகின்றனர். இந்த இன மக்களுக்கு ஒருவரின் மரணம் என்பது அவரது வாழ்க்கை முடிந்துவிட்டதாக அர்த்தமல்ல; மாறாக, அவரது ஆன்மா மற்றொரு பயணத்தைத் தொடங்குவதாக அவர்கள் நம்புகின்றனர். இயற்கையின் மீதும் ஆன்மீகத்தின் மீதும் தீவிர பற்று கொண்ட இவர்களது பழக்கவழக்கங்கள் வெளி உலகிற்கு வியப்பளிப்பதாக அமைகின்றன.

இவர்களது இனத்தில் ஒருவர் இறந்துவிட்டால், இறுதிச் சடங்கினை உடனடியாகச் செய்யாமல், காட்டில் உள்ள இலைகள் மற்றும் கிளைகளைக் கொண்டு உடலை மூடி ஒரு குறிப்பிட்ட இடத்தில் வைக்கின்றனர். அவ்வாறு வைக்கப்படும் உடலைச் சில காலத்திற்குப் பராமரித்து, எஞ்சியிருக்கும் எச்சங்களைச் சேர்த்து பின்பு உடலைத் தகனம் செய்கின்றனர். தகனம் செய்யப்படும் உடலின் சாம்பலை மிகவும் கவனமாகச் சேகரித்து வைப்பது இவர்களது பாரம்பரியமாகும். பின்பு, வாழைப்பழத்தில் தயாரிக்கப்படும் சூப் ஒன்றுடன் இந்த சாம்பலைக் கலந்து, குடும்ப உறுப்பினர்கள் மற்றும் உறவினர்கள் அனைவரும் அதனைப் பருகுகின்றனர்.

மானுடவியல் சொற்களில் இந்த பழக்கமானது அகநரமாமிச உண்ணல் என்று அழைக்கப்படுகிறது. இவர்கள் இதனை உணவுக்காகச் செய்யாமல், இறந்தவர்களுடன் இருக்கும் தொடர்பினைப் பேணுவதற்காகவும், அவர்களின் ஆன்மா சாந்தியடைவதற்காகவும் செய்கின்றனர். வெளி உலகிற்கு இது கொடூரமாகத் தெரிந்தாலும், இறந்தவர் தங்களது குடும்பத்துடனேயே தொடர்ந்து வாழ்வதாகவும், அவருக்குச் செலுத்தப்படும் அன்பின் மற்றும் மரியாதையின் அடையாளமாகவுமே இதனைப் புனிதமான சடங்காகப் பின்பற்றி வருகின்றனர்.