“உண்மையான நட்புனா இதுதான் பாஸ்..” தன் உயிர் நண்பனின் மகனுக்குத் தந்தையாக மாறிய பாசக்காரக் கடைக்காரர்..! இணையத்தை உலுக்கும் வைரல் வீடியோ..!!

இணையதளத்தில் தற்போது வைரலாகி வரும் ஒரு நெகிழ்ச்சியான வீடியோ, மனித உறவுகளின் ஆழத்தையும் உண்மையான நட்பின் மதிப்பையும் உலகிற்கு உணர்த்தியுள்ளது. இன்றைய பரபரப்பான நவீன வாழ்க்கையில் நட்பு பெரும்பாலும் சமூக வலைதளங்களோடு நின்றுவிடும் சூழலில், ஒரு கடைக்காரர் தனது மறைந்த நண்பனின் குடும்பத்தினரிடம் பணத்தைப் பெற்றுக் கொள்ள மறுத்து, தன் தூய்மையான அன்பை வெளிப்படுத்தியுள்ளார். இந்தச் சம்பவம் இணையவாசிகளின் கண்களைக் குளமாக்கியுள்ளதுடன், பலரையும் வெகுவாக ஈர்த்துள்ளது.

டிஜிட்டல் கிரியேட்டர் பாவேஷ் பகிர்ந்துள்ள இந்த வைரல் வீடியோவில், அவர் தனது இருசக்கர வாகனத்தின் பெட்டியில் காய்கறிகளை நிரப்பிக்கொண்டு, கடைக்காரர் அதற்குப் பணம் வாங்க மறுப்பதாகக் கூறுகிறார். அதற்கு அந்த முதிய கடைக்காரர் புன்னகையுடன், “அடேய்! இது வீட்டிற்குத்தானே போகிறது; வீட்டிற்குக் கொடுக்கும் பொருட்களுக்குப் பணம் வாங்குவார்களா?” என்று அன்போடு பதிலளிக்கிறார். பாவேஷின் தந்தை கடந்த 2013-ஆம் ஆண்டு காலமான நிலையில், கடந்த 13 ஆண்டுகளாக இந்த நட்பு தொடர்வதாகவும், தங்களை அந்த முதியவர் தனது சொந்தக் குடும்பத்தினரைப் போலப் பார்த்துக் கொள்வதாகவும் பாவேஷ் நெகிழ்ச்சியுடன் குறிப்பிடுகிறார்.

https://www.instagram.com/reel/Dee_xGip73O/?utm_source=ig_web_button_share_sheet

இந்த வீடியோவில் பாவேஷ் தன் தந்தையின் 35 வருட நண்பரான அந்த முதியவரின் கால்களைத் தொட்டுக் கும்பிட்டுவிட்டுச் செல்வதைக் காண முடிகிறது. அப்போது அந்த முதியவர் தன் கண்களில் தேங்கிய கண்ணீரை மறைக்க முயலும் காட்சி அனைவரின் இதயத்தையும் உருக்கும் வகையில் உள்ளது. பாவேஷின் தந்தையின் கடைக்கு எதிரேதான் இவருடைய கடை இருந்ததாகவும், மரணம் கூட பிரிக்க முடியாத இந்த அழியா நட்பு மற்றும் மனிதநேயம் குறித்து சமூக வலைதளங்களில் பலரும் பாராட்டிப் பேசி வருகின்றனர்.