“ஆற்றில் நுரை வர சோப் பயன்பாடா?” சின்னப்பிள்ளைக்கு கூட தெரியும்… சுற்றுச்சூழல் அமைச்சருக்கு அன்புமணி ராமதாஸ் சரமாரி கேள்வி..!!

நொய்யல் உள்ளிட்ட நதிகளில் நுரை பொங்குவதற்கு ஆலை மற்றும் நகரக் கழிவுகள் கலக்கவிடப்படுவதே முக்கியக் காரணம் என்பது சிறிய குழந்தைகளுக்கும் தெரிந்த ஒன்று என்று பாமக தலைவர் அன்புமணி ராமதாஸ் தெரிவித்துள்ளார். நதிகளைப் பாதுகாத்துத் தூய்மைப்படுத்த வேண்டிய பொறுப்பில் இருக்கும் அமைச்சரே இதுகுறித்துப் பொறுப்பற்ற முறையில் கருத்து தெரிவித்திருப்பது பெரும் அதிர்ச்சியளிக்கிறது என்று அவர் சுட்டிக்காட்டியுள்ளார்.

மக்களின் அன்றாடப் பயன்பாட்டிலுள்ள சோப்பு மற்றும் ஷாம்பு பயன்பாடுதான் ஆறுகளில் நுரை பொங்குவதற்குக் காரணம் என நகைச்சுவையாகக் கூறித் தப்பிப்பதைத் தவிர்க்க வேண்டும் என்று அவர் கேட்டுக்கொண்டுள்ளார். சுற்றுச்சூழல் மற்றும் நீர்நிலைகளைப் பாதுகாப்பதில் தீவிர கவனம் செலுத்தாமல், இதுபோன்று வேடிக்கையாகப் பேசுவது பொறுப்பான அணுகுமுறை அல்ல என்றும் அவர் விமர்சித்துள்ளார்.

எனவே, இதுபோன்ற நகைச்சுவைப் பேச்சுக்களை விடுத்து, மாசுபாட்டிலிருந்து நதிகளைப் பாதுகாக்கவும், கழிவுகள் கலப்பதைத் தடுக்கவும் சுற்றுச்சூழல் அமைச்சர் உடனடி நடவடிக்கை எடுக்க வேண்டும் என்று அன்புமணி ராமதாஸ் வலியுறுத்தியுள்ளார். நீர்நிலைகளின் பாதுகாப்பை உறுதிசெய்யத் தேவையான திட்டங்களை அரசு போர்க்கால அடிப்படையில் செயல்படுத்த வேண்டும் என்பதே அவரது கோரிக்கையாகும்.