கொளத்தூர் எம்.எல்.ஏ வி.எஸ். பாபு மாயம்..? முதல்வர் விஜய் அங்க திடீர் விசிட் அடிப்பதன் ரகசியம் இதுதான்..? போட்டுடைத்த சாட்டை துரைமுருகன்..!!

தமிழக வெற்றிக் கழகத் தலைவர் விஜய், குழந்தைகள் தின விழாவைத் தொடங்கி வைப்பதற்காகச் சென்னை கொளத்தூர் சட்டமன்றத் தொகுதிக்குச் செல்லவிருக்கும் சூழல் அரசியல் வட்டாரத்தில் பெரும் எதிர்பார்ப்பை ஏற்படுத்தியுள்ளது. அதே நேரத்தில், கொளத்தூர் தொகுதியின் தவெக எம்.எல்.ஏவான வி.எஸ். பாபுவின் தற்போதைய நிலை குறித்தும், முதல்வர் கொளத்தூர் செல்வதன் பின்னணி குறித்தும் நாம் தமிழர் கட்சியின் பிரமுகரான சாட்டை துரைமுருகன் வெளியிட்டுள்ள கருத்துகள் பெரும் சர்ச்சையைக் கிளப்பியுள்ளன.

கடந்த சட்டமன்றத் தேர்தலில் கொளத்தூர் தொகுதியில் திமுக தலைவர் மு.க. ஸ்டாலினை எதிர்த்துப் போட்டியிட்டு வெற்றி பெற்ற மூத்த முகமான வி.எஸ். பாபு, கடுமையான மூச்சுத்திணறல் காரணமாக கடந்த சில மாதங்களுக்கு முன்பு மருத்துவமனையில் அனுமதிக்கப்பட்டார். அதன் பிறகு அவர் வீடு திரும்பியதாகச் சில தகவல்கள் கூறப்பட்டாலும், கடந்த சில வாரங்களாக அவர் பொதுவெளியிலோ அல்லது தொகுதிப் பணிகளிலோ தலைகாட்டாமல் இருப்பதாகத் தகவல்கள் தெரிவிக்கின்றன.

இதனால் கொளத்தூர் தொகுதி மக்கள் தவெக மீது ஒருவித அதிருப்தியில் இருப்பதாகவும், தவெக ஆட்சிக்கு வந்த பின்னரும் தொகுதிக்குத் தேவையான நலத்திட்டங்கள் முழுமையாகச் சென்றடையவில்லை என்ற பேச்சுகள் எழுந்துள்ளதாகவும் சாட்டை துரைமுருகன் தனது யூடியூப் தளத்தில் விமர்சித்துள்ளார். மேலும், எம்.எல்.ஏ வி.எஸ். பாபு மருத்துவமனையிலேயே தலைமறைவாக உள்ளதாகவும் (அப்ஸ்காண்ட்), மக்களின் அந்த அதிருப்தியையும் கேள்விகளையும் தவிர்க்கவே முதல்வர் விஜய் கொளத்தூருக்கு நேரில் செல்கிறார் என்றும் அவர் பகிரங்கமாகக் குற்றம்சாட்டியுள்ளார்.

முதலமைச்சரின் இந்த விசிட் குறித்து பல்வேறு அரசியல் விவாதங்கள் எழுந்துள்ள நிலையில், கொளத்தூருக்குச் செல்லும் விஜய் அங்கு பல்வேறு நிகழ்ச்சிகளில் கலந்துகொண்டு மக்களைச் சந்திப்பார் என எதிர்பார்க்கப்படுகிறது. உடல்நலக்குறைவு காரணமாகத் தொகுதிப் பணிகளில் கவனம் செலுத்த முடியாத சூழலில் உள்ள எம்.எல்.ஏ வி.எஸ். பாபுவின் விவகாரமும், எதிர்க்கட்சிகளின் தொடர் விமர்சனங்களும் தற்போது அரசியல் களத்தில் சூட்டைப் பிடித்துள்ளன.