“எங்கே செல்வோம் நாங்கள்..?” வீடு இடிக்கப்படும் என்ற பயத்தால் 6 பெண்கள் எடுத்த விபரீத முடிவு.. போபாலில் உச்சகட்டப் பதற்றம்..!!

மத்தியப் பிரதேசத்தின் தலைநகர் போபாலில் உள்ள ஐஷ்பாக் பகுதியின் ஜனதா குடியிருப்பில், சுமார் 600 வீடுகளை இடிக்க நிர்வாகம் முடிவு செய்துள்ளதைத் தொடர்ந்து அப்பகுதியில் பெரும் பதற்றம் நிலவி வருகிறது. வீட்டுவசதி வாரியத்தால் கட்டப்பட்ட இந்தக் கட்டிடங்கள் காலப்போக்கில் மிகவும் சிதிலமடைந்து பாதுகாப்பற்ற நிலையில் இருப்பதால், அவற்றை இடிக்க போபால் மாநகராட்சி மற்றும் வீட்டுவசதி வாரியம் திட்டமிட்டுள்ளன. இந்த முடிவை எதிர்த்து அப்பகுதி மக்கள் தீவிரப் போராட்டத்தில் ஈடுபட்டு வரும் நிலையில், வீடுகள் இடிக்கப்பட்டால் தங்கள் குடும்பத்துடன் எங்கே செல்வது என்ற கடும் மன உளைச்சலால் வியாழக்கிழமை இரவு ஆறு பெண்கள் எலி விஷம் அருந்தி தற்கொலைக்கு முயன்றுள்ளனர்.

உடல்நிலை மோசமடைந்த அப்பெண்களை அக்கம்பக்கத்தினர் உடனடியாக ஆட்டோக்கள் மூலம் மீட்டு ஹமீதியா மருத்துவமனையில் சிகிச்சைக்காக அனுமதித்துள்ளனர். இது தொடர்பான காணொளிகள் சமூக வலைதளங்களில் வைரலாகிப் பெரும் பரபரப்பை ஏற்படுத்தியுள்ள நிலையில், காவல்துறையினர் சம்பவ இடத்திற்கு விரைந்து சென்று விசாரணை நடத்தி வருகின்றனர். மொத்தமுள்ள 600 குடியிருப்புகளில் சுமார் 110 வீடுகளில் மட்டுமே அசல் உரிமையாளர்கள் வசிப்பதாகவும், மீதமுள்ள வீடுகள் சட்டவிரோத ஆக்கிரமிப்பில் இருப்பதாகவும் கூறப்படுவது இந்த விவகாரத்தை மேலும் சிக்கலாக்கியுள்ளது.

பாதுகாப்புக் கருதி கட்டிடங்களை இடிப்பது அவசியம் என நிர்வாகம் தரப்பில் கூறப்பட்டாலும், நீண்ட காலமாக அங்கு வசித்து வரும் தங்களுக்கு மாற்று இடமோ அல்லது மறுவாழ்வோ வழங்காமல் வீடுகளை இடிக்கக் கூடாது என்பதே குடியிருப்பாளர்களின் பிரதான கோரிக்கையாக உள்ளது. தங்களுக்கு மாற்று வீடுகள் ஒதுக்கப்படுமா என்ற கேள்விக்கு நிர்வாகத்திடம் இருந்து தெளிவான பதில் கிடைக்காததால், குடியிருப்பாளர்களுக்கும் அதிகாரிகளுக்கும் இடையே தொடர் மோதல் போக்கு நீடித்து வருகிறது.