LATEST NEWS
“நான் சமைக்கிறேன்.. நீ 12 லட்சம் சம்பாதி…” திருமணத்திற்கு இப்படியொரு கண்டிஷனா..? மாப்பிள்ளையின் வைரல் போஸ்ட்டால் வெடித்த விவாதம்..!!
சமூக வலைதளமான ரெடிட்டில் ஒரு நபர் பதிவிட்ட விசித்திரமான திருமணத் தேவைகள் இணையத்தில் பெரும் விவாதத்தை ஏற்படுத்தியுள்ளது. “நான் வீட்டைக் கவனித்துக் கொள்கிறேன், நீ ஆண்டுக்கு 12 லட்சம் சம்பாதி!” என்ற தலைப்பில் அவர் எழுதியுள்ள இந்தப் பதிவில், தான் ஒரு முழு நேர இல்லத்தரவனாக (House Husband) இருக்க விரும்புவதாகவும், சமையல் செய்வது, வீட்டைச் சுத்தம் செய்வது மற்றும் அனைத்து வீட்டு வேலைகளையும் செய்வதில் தனக்கு மகிழ்ச்சி கிடைக்கும் என்றும் கூறியுள்ளார். மேலும், தனது வருங்கால மனைவி தன் விருப்பப்படி வேலை செய்யலாம் அல்லது தொழில் செய்யலாம் என்றும், அவர் குடும்பத்தின் பொருளாதாரப் பொறுப்பை ஏற்றுக்கொள்ள வேண்டும் என்றும் அவர் குறிப்பிட்டுள்ளார்.
ஆனால், அவர் முன்வைத்த இரண்டு முக்கிய நிபந்தனைகள்தான் இணையத்தில் கடுமையான விவாதத்தை ஏற்படுத்தியுள்ளன. முதலாவதாக, தனக்குத் திருமணம் ஆகப்போகும் பெண் ஆண்டுக்கு குறைந்தது 12 லட்சம் ரூபாய் சம்பாதிக்க வேண்டும் என்று அவர் நிபந்தனை விதித்துள்ளார். இரண்டாவதாக, தனக்குக் குழந்தைகள் வேண்டாம் என்றும், குழந்தைகளற்ற வாழ்க்கையை விரும்புவதாகவும் அவர் வெளிப்படையாகக் கூறியுள்ளார்.
இவரது இந்தப் பதிவு இணையவாதிகள் மத்தியில் இருவேறு கருத்துக்களைத் தோற்றுவித்துள்ளது. பெண்களால் இல்லத்தரசிகளாக இருக்க முடியும் என்றால், ஆண்கள் ஏன் இல்லக் கணவர்களாக இருக்கக் கூடாது என்றும், வீட்டு வேலையும் ஒரு வேலைதான் என்பதால் இதில் என்ன தவறு என்றும் ஒரு தரப்பினர் வாதிடுகின்றனர். மாறாக, இது ‘தலைகீழான வரதட்சணை’ போன்றது என்றும், பெண்ணிடம் இருந்து 12 லட்சம் சம்பளம் எதிர்பார்ப்பது மற்றும் தான் வீட்டில் உட்கார்ந்திருப்பது சமத்துவமாக இருக்காது என்றும் மற்றொரு தரப்பினர் கடுமையாக விமர்சித்து வருகின்றனர்.
