கோவில் வாசலில் விளையாடிய 4 வயது சிறுவன்… பாய்ந்து வந்து கடித்த கொடூர தெருநாய்.. மருத்துவமனையில் கதறும் குடும்பம்.. நெஞ்சை உலுக்கும் சோக சம்பவம்..!!

கர்நாடக மாநிலம் கலபுரகி நகரின் தரியாபூர் பகுதியில் உள்ள கணதேவதா கோவில் அருகே, சாலையில் விளையாடிக் கொண்டிருந்த மனோஜ் பூஜாரி ஜம்பகா என்ற 4 வயது சிறுவன் தெருநாய் கடித்ததில் பரிதாபமாக உயிரிழந்தான்.இன்று நிகழ்ந்த இந்தச் சோகமான சம்பவத்தில் பலியான சிறுவன், கலபுரகி தாலுகா ஜம்பகா கிராமத்தைச் சேர்ந்த காவலாளி சரணபசப்பா பூஜாரியின் மகன் என அடையாளம் காணப்பட்டுள்ளான். நாய் கடித்துக் குதறியதில் படுகாயமடைந்த அச்சிறுவனை உடனடியாக மீட்டு மருத்துவமனையில் அனுமதித்த போதிலும், சிகிச்சை பலனின்றி அவன் பரிதாபமாக உயிரிழந்தான்.

இந்தச் சோகம் கலபுரகி மற்றும் அதன் அண்டை மாவட்டங்களில் பெரும் அதிர்ச்சியை ஏற்படுத்தியுள்ளதுடன், தெருநாய்கள் தொல்லை குறித்த பொதுமக்கள் கவலையை மீண்டும் முன்னிறுத்தியுள்ளது. அண்மைக்காலமாக இப்பகுதியில் சிறு குழந்தைகள் நாய் கடிக்கு ஆளாவது தொடர்கதையாகி வருகிறது; கடந்த மாதம் சேடம் தாலுகாவில் சான்வி என்ற 4 வயது சிறுமி தெருநாய்கள் கூட்டமாகத் தாக்கியதில் முகத்தில் பலத்த காயமடைந்தாள். அதேபோல ராய்ச்சூர் நகரிலும் கோபால் என்ற 4 வயது சிறுவன் நாய் கடித்ததில் தலையில் பலத்த காயம் அடைந்தான். இந்தத் தொடர் தாக்குதல்களால் பீதியடைந்துள்ள உள்ளூர் மக்கள், தெருநாய்களின் பெருக்கத்தைக் கட்டுப்படுத்தவும், குழந்தைகளின் பாதுகாப்பை உறுதி செய்யவும் அதிகாரிகள் உடனடியாக அதிரடி நடவடிக்கை எடுக்க வேண்டும் என வலியுறுத்தியுள்ளனர்.