அடக்கொடுமையே..! சுதந்திர தின அன்னைக்கு இப்படி ஒரு சோகமா… பள்ளிக்குச் சென்ற குழந்தை பிணமாக திரும்பிய பரிதாபம்..! உத்தரப் பிரதேசத்தில் பதறவைக்கும் சம்பவம்..!!

உத்தரப் பிரதேச மாநிலம் சும்பல் பகுதியில் உள்ள ‘அல் ஹஸனைன் பப்ளிக் பள்ளி’யில் சுதந்திர தின விழா கொண்டாட்டங்களின் போது ஒரு கொடூரமான விபத்து நிகழ்ந்தது. அங்குள்ள விழாவின் மகிழ்ச்சியான சூழ்நிலையை இந்த விபத்து சோகமாக மாற்றியது. பள்ளியின் பிரதான நுழைவாயிலின் மேலிருந்த சஜ்ஜா திடீரென இடிந்து கீழே விழுந்தது. அந்தச் சமயத்தில் அங்கிருந்த குழந்தைகள் இதன் இடிபாடுகளுக்குள் சிக்கிக் கொண்டனர். இதில் 6 வயது சிறுவன் ஒருவன் உயிரிழந்தான், மேலும் இரண்டு குழந்தைகள் படுகாயமடைந்ததாகத் தகவல்கள் தெரிவிக்கின்றன. இந்த சம்பவத்தைத் தொடர்ந்து பள்ளி வளாகத்தில் பெரும் குழப்பமும் பதற்றமும் நிலவியது.

சுதந்திர தினத்தை முன்னிட்டு பள்ளியில் சிறப்பு நிகழ்ச்சிகள் ஏற்பாடு செய்யப்பட்டிருந்த நிலையில், பிரதான கேட்டின் சஜ்ஜா திடீரென இடிந்து விழுந்ததும் அங்கிருந்த குழந்தைகளும் மற்றவர்களும் அலறித் துடித்தனர். உடனே அருகில் இருந்தவர்கள் விரைந்து செயல்பட்டு மீட்புப் பணியில் ஈடுபட்டனர். இடிபாடுகளுக்குள் சிக்கிய குழந்தைகளை மீட்டு சிகிச்சைக்காக உடனடியாக மருத்துவமனைக்கு அனுப்பி வைத்தனர். எனினும், தீவிர காயமடைந்த 6 வயது சிறுவனைப் பரிசோதித்த மருத்துவர்கள் அவன் ஏற்கனவே இறந்துவிட்டதாக அறிவித்தனர். காயமடைந்த மற்ற இரு குழந்தைகளுக்கு மருத்துவமனையில் சிகிச்சை அளிக்கப்பட்டு வருகிறது.

சம்பவம் குறித்து தகவல் அறிந்ததும் சும்பல் மாவட்ட ஆட்சியர் மற்றும் காவல் கண்காணிப்பாளர் உள்ளிட்ட உயர் அதிகாரிகள் சம்பவ இடத்திற்கு நேரில் சென்று ஆய்வு மேற்கொண்டனர். விபத்துக்கான காரணம் குறித்து விசாரணை நடத்த அதிகாரிகளுக்கு உத்தரவிடப்பட்டுள்ளது. சுதந்திர தின விழாவில் உற்சாகமாகப் பங்கேற்ற குழந்தைகள் மற்றும் ஆசிரியர்களின் மகிழ்ச்சித் தருணம் திடீரென சோகத்தில் முடிந்ததால் அப்பகுதி முழுவதிலும் சோகமயம் சூழ்ந்துள்ளது. கட்டிடத்தின் தரம், பராமரிப்பு மற்றும் இதில் ஏதேனும் அலட்சியம் உள்ளதா என்பது குறித்து காவல்துறை மற்றும் நிர்வாகத்தினர் விசாரணை நடத்தி வருகின்றனர்.