அடப்பாவிகளா..! திருடுறதுக்கு உலகத்துல வேற எதுவுமே கிடைக்கலையா… தங்கம், பணத்தை விட்டுட்டு.. எறும்புக்கூட்டைத் தூக்கிட்டுப் போன மர்ம கும்பல்.. பின்னணி என்ன..?!

திருட்டு என்றாலே நம் நினைவுக்கு வருவது தங்கம், வெள்ளி, பணம் அல்லது நகைகள்தான். ஆனால், நகைகளுக்குப் பதிலாக ஒரு நிலத்திலிருந்து எறும்புகளின் கூட்டை யாராவது தோண்டி எடுத்துச் சென்றால் எப்படி இருக்கும்? கேட்பதற்கு ஏதோ ஒரு நகைச்சுவைப் படத்தின் காட்சி போலத் தோன்றினாலும், பிரிட்டனில் இது உண்மையில் நடந்துள்ளது. அங்குள்ள ஒரு பாதுகாக்கப்பட்ட இயற்கை காப்பகத்திலிருந்து, உலகின் மிக அரிதான எறும்புகளின் முழுக்கூட்டையும் திருடர்கள் தூக்கிச் சென்றுள்ளனர். இந்த விசித்திரமான திருட்டு வனவிலங்கு ஆர்வலர்களையும் காவல்துறையினரையும் ஒருசேர அதிர்ச்சியில் ஆழ்த்தியுள்ளது.

பிபிசி செய்தி நிறுவனத்தின் அறிக்கையின்படி, இந்தச் சம்பவம் இங்கிலாந்தின் டெவன் பகுதியில் நடந்துள்ளது. அங்குள்ள ‘சுட்லீ நைட்டன் ஹீத்’ இயற்கை காப்பகத்தில், மெல்லிய தலைகளைக் கொண்ட ‘குறுகிய தலை எறும்பு’ எனப்படும் மிக அரிதான எறும்பு இனம் வாழ்ந்து வருகிறது. இங்கிலாந்தில் இந்த எறும்பு இனம் எஞ்சியுள்ள கடைசி புகலிடம் இதுவாகும். கடந்த அக்டோபர் நடுப்பகுதியில் ஆய்வாளர்கள் வழக்கம்போல ஆய்வுக்குச் சென்றபோது அவர்கள் கண் முன்பாகவே பெரும் அதிர்ச்சி காத்திருந்தது. எறும்புகளின் கூடுகள் இருந்த இடத்தில் ஒரு பெரிய குழியும், தரையில் மண்வெட்டியால் தோண்டப்பட்ட அடையாளங்களும் மட்டுமே இருந்தன. திருடர்கள் மிகவும் தந்திரமாகத் தரையைத் தோண்டி முழுக்கூட்டையும் திருடிச் சென்றுள்ளனர்.

வனவிலங்கு நிபுணர்களின் கூற்றுப்படி, இந்த மெல்லிய தலை எறும்புகள் மிகவும் சிறப்பு வாய்ந்தவை என்பதால், இந்தத் திருட்டு பெரும் கவலையை ஏற்படுத்தியுள்ளது. இது சாதாரண திருட்டு அல்ல என்றும், இந்த முழு எறும்பு இனத்திற்கே இதனால் ஆபத்து உருவாகியுள்ளதாகவும் நிபுணர்கள் எச்சரிக்கின்றனர். இந்த வகை எறும்புகளின் ஒரு கூடு என்பது ஆயிரக்கணக்கான எறும்புகளின் படையாகவே திகழ்கிறது. ஒரு கூட்டிற்குள் 1,000 முதல் 5,000 எறும்புகள் வரை வசிக்கக்கூடும். மேலும், இக்கூடுகளில் ஒன்று அல்லது அதற்கு மேற்பட்ட ராணி எறும்புகள் இருக்கும், ஒரு ராணி எறும்பு சுமார் 25 ஆண்டுகள் வரை உயிர்வாழும் ஆற்றல் கொண்டது.