நடுராத்திரியில் குப்பை கொட்டியவருக்கு விழுந்த சாட்டையடி.. திடீரென வந்த சத்தத்தால் அலறியடித்து ஓடிய காட்சி.. இணையத்தில் செம வைரல்..!

உத்தரப் பிரதேசத்தின் கிரேட்டர் நொய்டா ஹைடெக் நகரின் செக்டார் பீட்டா-1 பகுதியில், பொது இடத்தில் குப்பை கொட்டிய நபரை சிசிடிவி மற்றும் ஒலிபெருக்கி மூலம் எச்சரித்து அக்குப்பையை அவரே அள்ள வைத்த சுவாரசியமான சம்பவம் சமூக ஊடகங்களில் வைரலாகி வருகிறது. அக்டோபர் 10ஆம் தேதி இரவு 10:15 மணியளவில், ஒரு நபர் வீட்டின் பிளாஸ்டிக் பைகளில் இருந்த குப்பைகளைச் சாலையோர சுவருக்கு அருகில் ரகசியமாகப் போட்டுவிட்டுச் செல்ல முயன்றார். அப்போது செக்டாரில் உள்ள சிசிடிவி கேமரா மூலம் கண்காணித்துக் கொண்டிருந்த கட்டுப்பாட்டு அறை அதிகாரி இதனை நேரலையில் பார்த்துள்ளார்.

அதிகாரி உடனடியாக கேமராவுடன் இணைக்கப்பட்ட பொது அறிவிப்பு அமைப்பை பயன்படுத்தி, போலிஸார் போல “போட்ட குப்பையை உடனே எடுங்கள், இல்லையெனில் அபராதம் விதிக்கப்படும்” என்று எச்சரித்தார். அமைதியான இரவில் திடீரென ஒலித்த குரலைக் கேட்டு அந்த நபர் அதிர்ச்சியடைந்து, தன்னை யார் பார்க்கிறார்கள் என்று சுற்றிலும் தேடினார். மீண்டும் எச்சரிக்கை விடுக்கப்பட்டு, காலை நேரத்தில் கிரேட்டர் நொய்டா அதிகாரசபை மூலம் கடுமையான அபராதம் விதிக்கப்படும் எனக் கூறப்பட்டதால் பயந்துபோன அந்த நபர், தான் போட்ட குப்பைகளைத் தானே அள்ளிவிட்டு அங்கிருந்து சென்றார்.

செக்டார் பீட்டா-1 குடியிருப்போர் நலச் சங்கத்தின் பொதுச் செயலாளர் ஹரேந்திர பாதி என்பவரால், செக்டாரைத் தூய்மையாக வைத்திருக்க இந்த ஸ்மார்ட் டிஜிட்டல் கண்காணிப்பு முயற்சி தொடங்கப்பட்டது. வீடுகளுக்கே வந்து குப்பை சேகரிக்கும் முறை இருந்தபோதிலும், சிலர் காலி இடங்களிலும் சுவர்களிலும் குப்பை கொட்டுவதைத் தடுக்கவே இந்தத் திட்டம் கொண்டுவரப்பட்டது. இந்தத் தனித்துவமான முயற்சியின் வீடியோ வைரலானதை அடுத்து, தூய்மையைப் பராமரிக்க இத்தகைய டிஜிட்டல் கண்காணிப்பு மிகவும் அவசியம் எனப் பொதுமக்களும் பிற பகுதி மக்களும் ஆர்.டபிள்யூ.ஏ-வின் இந்தச் செயல்பாட்டைப் பாராட்டி வருகின்றனர்.