“மேலே மினுமினுப்பு.. தண்டவாளத்தில் குப்பை..! சோனிபட் இரயில் நிலைய தூய்மைப் பணியாளரின் அதிர்ச்சி வீடியோ..!!”

ஹரியானாவின் சோனிபட் இரயில் நிலையத்தில் தூய்மைப் பணியாளர் ஒருவர் செய்த அதிர்ச்சியூட்டும் செயல் குறித்த வீடியோ சமூக வலைத்தளங்களில் வைரலாகி வருகிறது. அந்தப் பணியாளர் இரயில் நிலையத்தின் நடைமேடையை மிகவும் சுத்தமாகப் பெருக்கி, அங்கிருந்த குப்பைகள் மற்றும் காய்ந்த இலைகள் அனைத்தையும் ஒரு மூலையில் சேகரிக்கிறார். ஆரம்பத்தில் அவர் தனது வேலையை மிகச் சரியாகச் செய்வது போலவும், சேகரித்த குப்பைகளைக் குப்பைத் தொட்டியில் போடப் போவது போலவும் தோற்றமளிக்கிறது.

ஆனால், நடைமேடையில் இருந்த ஒரு நபர் அங்கிருந்து சற்று தூரம் நகர்ந்ததும், அந்தத் தூய்மைப் பணியாளர் தன்னை யாராவது கவனிக்கிறார்களா என்று சுற்றும் முற்றும் பார்க்கிறார். யாரும் பார்க்கவில்லை என்பதை உறுதி செய்துகொண்ட பிறகு, தான் திரட்டிய குப்பைகள் அனைத்தையும் அள்ளி அப்படியே இரயில் தண்டவாளத்தில் வீசி எறிகிறார். நடைமேடையைச் சுத்தமாக மாற்றிவிட்டு, அனைத்துக் கழிவுகளையும் தண்டவாளத்தில் கொட்டிய அவரது இந்த விசித்திரமான செயல் அங்கிருந்த ஒருவரால் ரகசியமாக வீடியோ எடுக்கப்பட்டுள்ளது.

இந்த வீடியோ எக்ஸ் தளத்தில் ‘@gharkekalesh’ என்ற பக்கத்தில் பகிரப்பட்டு, தற்போது லட்சக்கணக்கான பார்வைகளைப் பெற்று இணையத்தில் தீயாய் பரவி வருகிறது. இதைப் பார்த்த நெட்டிசன்கள் பலரும் அதிர்ச்சியடைந்து, “மேல்புறத்தை மட்டும் சுத்தமாகக் காட்டிவிட்டு, உள்ளே அசுத்தத்தை மறைப்பது என்ன மாதிரியான சுத்தம்?” என்று கேள்வி எழுப்பி வருகின்றனர். இது உண்மையான தூய்மைப் பணி அல்ல, வெறும் வெளிவேஷம் என்றும், பொது இடங்களை இதுபோன்று அசுத்தமாக்கும் பணியாளர்கள் மீது நிர்வாகம் கடுமையான நடவடிக்கை எடுக்க வேண்டும் என்றும் பொதுமக்கள் தங்களது கண்டனங்களைப் பதிவிட்டு வருகின்றனர்.