நீங்க அங்க உக்காருங்க..! அமைச்சர் இருக்கையில் அமர மறுத்த புஸ்ஸி ஆனந்த்… தலைமைச் செயலகத்தில் அன்புமணி ராமதாஸுடன் நெகிழ்ச்சி சந்திப்பு..!!

கர்நாடக அரசு காவிரி ஆற்றின் குறுக்கே மேகதாது அணை கட்டுவதற்கு எதிராக பாமக தலைவர் அன்புமணி ராமதாஸ் தொடர்ந்து குரல் கொடுத்து வருகிறார். இது தொடர்பாக தமிழக முதல்வர் விஜய்யிடம் அனைத்துக் கட்சிக் கூட்டத்தைக் கூட்ட வேண்டும் என்று கோரிக்கை விடுத்திருந்த நிலையில், ஆலோசனை நடத்துவதற்காக அன்புமணி ராமதாஸ், சௌமியா அன்புமணி மற்றும் செஞ்சி தொகுதி எம்.எல்.ஏ. கணேஷ்குமார் ஆகியோர் சென்னை தலைமைச் செயலகத்திற்குச் சென்றனர். அன்புமணி ராமதாஸ் வருவதை அறிந்த அமைச்சர் புஸ்ஸி ஆனந்த், தலைமைச் செயலகத்தின் நுழைவாயிலுக்கே நேரடியாக வந்து அவர்களை ஆச்சரியப்படுத்தும் விதமாக வரவேற்று அழைத்துச் சென்றார்.

அமைச்சர் புஸ்ஸி ஆனந்தின் அறைக்குச் சென்ற பிறகு, இருவரும் பரஸ்பரம் பொன்னாடை அணிவித்து மரியாதை செலுத்திக் கொண்டனர். அதைத் தொடர்ந்து நடைபெற்ற ஆலோசனைக் கூட்டத்தின் போது, அமைச்சருக்காக ஒதுக்கப்பட்டிருந்த அதிகாரப்பூர்வ முதன்மை இருக்கையில் அமராமல், அன்புமணி ராமதாஸின் அருகிலேயே அமைச்சர் புஸ்ஸி ஆனந்த் அமர முயன்றார். இதைக் கவனித்த அன்புமணி, அமைச்சருக்கான இருக்கையிலேயே அமருமாறு பலமுறை வற்புறுத்திய பின்னரே, அமைச்சர் புஸ்ஸி ஆனந்த் தனது அதிகாரப்பூர்வ இருக்கையில் அமர்ந்தார். இந்த நெகிழ்ச்சியான சம்பவம் அங்கு கூடியிருந்தவர்களின் கவனத்தை ஈர்த்தது.

இந்த சுமுகமான சந்திப்பின் போது, மேகதாது அணை விவகாரத்தில் தமிழக அரசு அடுத்து மேற்கொள்ள வேண்டிய நடவடிக்கைகள் குறித்தும், இந்த அணைத் திட்டத்திற்கு எதிராக அனைத்துக் கட்சிகளையும் ஒருங்கிணைத்து ஒருமித்த நிலைப்பாட்டை எடுப்பது குறித்தும் முக்கிய ஆலோசனைகள் மேற்கொள்ளப்பட்டன. தலைமைச் செயலகத்தில் அமைச்சர் புஸ்ஸி ஆனந்த், அன்புமணி ராமதாஸுக்கு அளித்த இந்த சிறப்பான வரவேற்பும், இருக்கை விவகாரத்தில் காட்டிய மரியாதையும் தற்போது அரசியல் வட்டாரத்தில் பரவலாகப் பேசப்பட்டு வருகிறது.