நடுநடுங்கவைக்கும் விபத்து.. பிக்கப் வாகனம் – டம்ப்பர் லாரி மோதிய விபத்தில் 7 தொழிலாளர்கள் துடிதுடிக்க பலி… பெரும் அதிர்ச்சி..!!

குஜராத் மாநிலத்தின் கட்ச் மாவட்டத்தில் ஒரு பிக்கப் வாகனமும் டம்ப்பர் லாரியும் ஒன்றுடன் ஒன்று பயங்கரமாக மோதிக்கொண்டதில் 7 பேர் பரிதாபமாக உயிரிழந்தனர். இந்த விபத்து வெள்ளிக்கிழமை அன்று நிகழ்ந்தது. விபத்தின் தீவிரத்தால் பிக்கப் வாகனம் பலத்த சேதமடைந்ததுடன், சம்பவ இடத்திலேயே உயிரிழப்புகள் ஏற்பட்டுள்ளன.

உயிரிழந்த 7 பேரில் 6 பேர் உத்தரப் பிரதேச மாநிலத்தின் சீதாபூர் மாவட்டத்தைச் சேர்ந்தவர்கள் ஆவர். குறிப்பாக சீதாபூரின் ராம்பூர் மதுரா பகுதியைச் சேர்ந்த பிந்த்ரா பூர்வா, தஹ்லா, பரூவா பெஹ்ரா மற்றும் கனேவா ஆகிய கிராமங்களைச் சேர்ந்த குல்தீப், சந்தீப், தினேஷ், அனில், அனூப் மற்றும் தேஷ்ராஜ் ஆகியோர் இந்த விபத்தில் உயிரிழந்ததாக அடையாளம் காணப்பட்டுள்ளனர்.

பிழைப்பிற்காக குஜராத் சென்ற தங்கள் ஊரைச் சேர்ந்த ஆறு பேரின் திடீர் மரணச் செய்தி சீதாபூரில் உள்ள அவர்களின் சொந்தக் கிராமங்களுக்கு எட்டியதும் அங்கு பெரும் சோக அலை வீசியுள்ளது. உறவினர்களை இழந்து தவிக்கும் குடும்பத்தினருக்கு கிராம மக்கள் நேரில் சென்று ஆறுதல் கூறி வருகின்றனர். இந்த துயர சம்பவம் இரு மாநிலங்களிலும் பெரும் அதிர்ச்சியை ஏற்படுத்தியுள்ளது.