LATEST NEWS
செம அப்செட்டில் EPS..! அதிமுகவிலிருந்து விலகினார் அப்சரா ரெட்டி… அடுத்து தவெக-வில் இணையப் போவதாகப் பரபரப்புத் தகவல்..!
அதிமுக கொள்கை பரப்பு துணைச் செயலாளராகப் பணியாற்றி வந்த அப்சரா ரெட்டி, அக்கட்சியின் அடிப்படை உறுப்பினர் உள்ளிட்ட அனைத்துப் பொறுப்புகளில் இருந்தும் விலகுவதாக அதிரடியாக அறிவித்துள்ளார். இதுதொடர்பாக அதிமுக பொதுச் செயலாளர் எடப்பாடி பழனிசாமிக்கு அவர் முறைப்படி கடிதம் அனுப்பியுள்ளார். இந்த விலகல் செய்தி தமிழக அரசியல் வட்டாரத்தில் தற்பொழுது பெரும் பரபரப்பை ஏற்படுத்தியுள்ளது.
தனது விலகல் கடிதத்தில், மனதில் மிகுந்த கனத்த உணர்வுடன் இந்த முடிவை எடுப்பதாக அப்சரா ரெட்டி குறிப்பிட்டுள்ளார். மேலும், இந்த முடிவு எந்தவித கசப்புணர்வாலோ அல்லது தனிப்பட்ட வருத்தத்தினாலோ எடுக்கப்பட்டது அல்ல என்றும், கட்சியின் தலைமைக்கு தனது நன்றியைத் தெரிவித்துக் கொள்வதாகவும் அவர் சுட்டிக்காட்டியுள்ளார். தனது அரசியல் பயணம் இனி புதிய பாதையில் செல்லக்கூடும் என்றாலும், மக்களுக்காகப் பணியாற்ற வேண்டும் என்ற தனது நோக்கம் எப்போதும் மாறாது என்றும் அவர் உறுதியளித்துள்ளார்.
அதிமுகவில் இருந்து விலகியுள்ள அப்சரா ரெட்டி, அடுத்ததாக நடிகர் விஜய் தொடங்கியுள்ள தமிழக வெற்றிக் கழகத்தில் (தவெக) இணையவுள்ளதாக அரசியல் வட்டாரங்களில் பரவலாகப் பேசப்படுகிறது. அண்மைக்காலமாக தவெகவின் கொள்கைகளும் செயல்பாடுகளும் பலரைக் கவர்ந்து வரும் நிலையில், அப்சராவின் இந்த அடுத்தகட்ட நகர்வு அக்கட்சிக்கு கூடுதல் பலம் சேர்க்கும் என்று எதிர்பார்க்கப்படுகிறது.
