மரண பயத்தின் உச்சம்.. பெருவெள்ளத்தில் பொம்மைகளாக அடித்துச் செல்லப்படும் கார்கள்.. நெஞ்சை உறைய வைக்கும் வீடியோ..!!

சிலியின் தலைநகரான சாண்டியாகோவில் கொட்டித்தீர்த்த கனமழையால் ஏற்பட்ட திடீர் வெள்ளத்தில் கார்கள் அடித்துச் செல்லப்படும் மற்றும் வாகன ஓட்டிகள் கட்டுப்பாட்டை இழந்து தவிக்கும் நெஞ்சைப் பதறவைக்கும் காட்சிகள் வெளியாகியுள்ளன. அப்பகுதியில் நிலச்சரிவை ஏற்படுத்திய இந்த பெருவெள்ளத்தில், வெள்ள நீர் தெருக்களுக்குள் அசுர வேகத்தில் புகுந்து வாகனங்களை அடித்துச் செல்லும் பயங்கரமான தருணங்கள் அங்குள்ள பாதுகாப்பு கேமராக்களில் பதிவாகியுள்ளன. வெள்ளத்தின் வேகம் தாங்காமல் ஒரு நபர் உயிரைக் காக்க அங்கிருந்த லாரி ஒன்றைத் தவிப்புடன் கெட்டியாகப் பிடித்துக் கொண்டு தொங்கும் காட்சிகள் பார்ப்போரை அதிர வைத்துள்ளன.

இந்த இயற்கைப் பேரிடரால் இதுவரை குறைந்தது ஆறு பேர் காயமடைந்துள்ளனர், நூற்றுக்கணக்கான வீடுகள் வெள்ளத்தில் மூழ்கியுள்ளன, மேலும் குடியிருப்பாளர்கள் பாதுகாப்பான இடங்களுக்கு வெளியேற்றப்பட்டு வருகின்றனர். குறிப்பாக லாஸ் காண்டேஸ் பகுதியில் வெள்ள பாதிப்பு மிகத் தீவிரமாக உள்ளதால், அங்குள்ள அதிகாரிகள் அவசர நிலை பிரகடனத்தை அறிவித்துள்ளனர். தொடர்ந்து பெய்து வரும் கனமழை மற்றும் நிலச்சரிவுகளால் சிலி நாட்டின் தலைநகரமே தற்போது ஸ்தம்பித்துப் போயுள்ளது.