“என் ஹேர் ஸ்டைலை கூட சர்ச்சையாக்குறாங்க” என்னை மட்டுமே ஏன் குறி வைக்குறீங்க..? சென்னை மேயர் பிரியா குமுறல்..!!

தனது ஒவ்வொரு தனிப்பட்ட முடிவும், வாழ்க்கை முறையும் தொடர்ந்து பொதுவெளியில் கேள்விக்குள்ளாக்கப்பட்டு தேவையற்ற சர்ச்சையாக்கப்படுவதாக சென்னை மேயர் ஆர். பிரியா வேதனை தெரிவித்துள்ளார். இதுகுறித்து அவர் வெளியிட்டுள்ள பதிவில், தான் எந்தவொரு சிறிய காரியத்தைச் செய்தாலும் அது உடனே சர்ச்சையாக்கப்பட்டு விவாதப் பொருளாக மாற்றப்படுகிறது என்று குறிப்பிட்டுள்ளார். மேலும், எப்போதும் தன்னை மட்டுமே ஏன் இவ்வாறு குறிவைக்கிறார்கள்? என்ற ஆதங்கத்தையும் அவர் வெளிப்படுத்தியுள்ளார்.

அரசியல் மற்றும் மேயர் என்ற அதிகாரப்பூர்வ பதவிக்கு அப்பாற்பட்டு, ஒரு பெண்ணாகத் தனக்கு இருக்கும் தனிப்பட்ட உரிமைகளைச் சுட்டிக்காட்டியுள்ள அவர், முதலில் பெண்களை மதிக்கக் கற்றுக்கொள்ள வேண்டும் என்று விமர்சகர்களுக்கு வலியுறுத்தியுள்ளார். “நான் பர்கர் சாப்பிட்டாலும் சரி, எனது விருப்பப்படி முடி வெட்டிக்கொண்டாலும் சரி, அதைக் கூட ஒரு பெரிய பிரச்சினையாக மாற்றிச் சர்ச்சையை உருவாக்குகிறார்கள்” என்று அவர் தனது பதிவில் விரிவாகக் குறிப்பிட்டுள்ளார்.

பொதுவாழ்வில் இருக்கும் பெண் நிர்வாகிகளின் தனிப்பட்ட சுதந்திரம் மற்றும் தேர்வுகள் எவ்வாறு சமூக வலைத்தளங்களிலும் ஊடகங்களிலும் மிகைப்படுத்தப்பட்டு விமர்சிக்கப்படுகின்றன என்பதை மேயர் பிரியாவின் இந்த ஆதங்கம் வெளிச்சம்போட்டுக் காட்டியுள்ளது. இவருடைய இந்தப் பதிவு தற்பொழுது அரசியல் வட்டாரங்களிலும், சமூக வலைத்தளங்களிலும் பெரும் விவாதத்தையும் அவருக்கு ஆதரவான குரல்களையும் பெற்று வருகிறது.