“என் வாழ்க்கையிலேயே செஞ்ச பெரிய தப்பு நீதான்..! 2AC பெட்டியில் அடித்துக்கொண்ட தம்பதி… கடைசியில் TTE எடுத்த அதிரடி முடிவு..!!

டெல்லியிலிருந்து புறப்பட்ட பூர்வா எக்ஸ்பிரஸ் ரயிலின் 2AC பெட்டியில் பயணித்த பயணி ஒருவர், அங்கு நடந்த ஒரு சம்பவத்தை ரெடிட்டில் பகிர்ந்துள்ளார். அந்தப் பெட்டியில் 30 வயதிற்குட்பட்ட ஒரு இளம் தம்பதியும், அவர்களுக்கு அருகில் மற்றொரு காதல் ஜோடியும் பயணித்துள்ளனர். ஆரம்பத்தில் அனைத்தும் இயல்பாகவே இருந்த நிலையில், காலை 10 மணியளவில் அந்தத் தம்பதியினரிடையே மனைவியின் கல்வித் தகுதி குறித்து திடீரென வாக்குவாதம் தொடங்கியது. இந்தச் சண்டை விரைவிலேயே பெரிய அளவில் வெடித்து, இருவருமே உரத்த குரலில் கத்தத் தொடங்கினர். கணவன் தன் மனைவியைத் திருமணம் செய்ததே தன் வாழ்நாளின் மிகப்பெரிய தவறு என்றும், அவர் பணத்தை வீணடிப்பதாகக் கூறி அவரை மனநலம் பாதிக்கப்பட்டவர் என்றும் திட்டத் தொடங்கினான்.

இந்த வாக்குவாதம் மேலும் தீவிரமடைந்த நிலையில், அந்தப் பெண் தன் மாமியாரை முட்டாள் என்று பகிரங்கமாகத் திட்டினார். இதனால் ஆத்திரமடைந்த கணவன், உடனே தனது தாயாரை தொலைபேசியில் அழைத்து விவாகரத்து பெற வழக்கறிஞரை ஏற்பாடு செய்யுமாறு கூறினார். தொடர்ந்து, தனது மனைவி நொய்டாவில் மற்றொரு நபருடன் தொடர்பில் இருப்பதாகவும் குற்றம் சாட்டினார். இதற்குப் பதிலடியாக அந்தப் பெண், கணவன் மீது பொய் வழக்கு பதிவு செய்யப் போவதாக மிரட்டினார். உடனே கணவன், தனக்கு உயர் அரசியல்வாதிகளின் செல்வாக்கு இருப்பதாகக் கூறி சவாலிட்டார். அருகில் இருந்த காதல் ஜோடி அவர்களை அமைதியாக்க முயன்றும், இருவரின் சண்டையும் கட்டுக்கடங்காமல் முழுப் பெட்டியிலும் பெரும் பரபரப்பை ஏற்படுத்தியது.

பயணிகளிடையே எழுந்த சலசலப்பைத் தொடர்ந்து, அங்கு வந்த TTE உடனடியாகத் தலையிட்டு இருவரையும் தனித்தனியாகப் பிரித்தார். கணவனை அந்தப் பெட்டியிலிருந்து மாற்றி, வேறு ஒரு பெட்டியில் அவருக்கு இருக்கை வழங்கி அனுப்பி வைத்தார். இந்தச் சம்பவம் முழுதும் உண்மை என்றும், தன்னிடம் இதன் ஒலிப்பதிவு இருப்பதாகவும் அந்த ரெடிட் பயனர் தெரிவித்துள்ளார். ரயில் பயணத்தின் போது ‘பிக் பாஸ்’ நிகழ்ச்சியை நேரலையில் பார்த்தது போல இருந்ததாக இணையவாசிகள் பலர் கருத்து தெரிவித்து வருகின்றனர்.