“விவாகரத்து இல்லாவிட்டாலும் ‘லிவ்-இன்’ உறவில் வாழலாம்.. தனிப்பட்ட சுதந்திரத்தை யாரும் தடுக்க முடியாது..” லிவ்-இன் ஜோடிக்கு ஆதரவாக நீதிமன்றம் கொடுத்த அதிரடி உத்தரவு..!!

பஞ்சாப்-ஹரியானா உயர் நீதிமன்றம், லிவ்-இன் ரிலேஷன்ஷிப்பில் வாழும் ஜோடிகளின் உரிமைகள் குறித்து முக்கியமான கருத்து ஒன்றை வெளியிட்டுள்ளது. ஒரு பெண்ணுக்கு தனது முதல் திருமணத்திலிருந்து சட்டப்பூர்வமாக விவாகரத்து கிடைக்கவில்லை என்றாலும், அவர் தனது விருப்பமான துணையுடன் லிவ்-இன் உறவில் வாழ்வதற்கும், பாதுகாப்பு கோருவதற்கும் உள்ள உரிமையிலிருந்து அவரைத் தடுத்துவிட முடியாது என்று நீதிமன்றம் தெளிவுபடுத்தியுள்ளது. விவாகரத்து கிடைக்கவில்லை என்ற ஒரே காரணத்திற்காக பாதுகாப்புக் கோரும் மனுவை நிராகரிக்க முடியாது என்றும் நீதிமன்றம் குறிப்பிட்டுள்ளது.

சண்டிகரைச் சேர்ந்த ஒரு பெண்ணும் அவரது லிவ்-இன் துணையும் தாக்கல் செய்த மனுவை விசாரிக்கும் போதே உயர் நீதிமன்றம் இந்த அவதானிப்பைத் தெரிவித்தது. தங்கள் உயிருக்கும் தனிப்பட்ட சுதந்திரத்திற்கும் ஆபத்து இருப்பதாகக் கூறி இருவரும் நீதிமன்றத்தில் பாதுகாப்பு கோரியிருந்தனர். இந்த வழக்கை விசாரித்த உயர் நீதிமன்றம், கடந்த அக்டோபர் 30 அன்று அந்த ஜோடி அளித்த புகாரைப் பரிசீலிக்குமாறும், ஆபத்தின் தீவிரத்தை மதிப்பிட்டு சட்டத்தின்படி உரிய நடவடிக்கை எடுக்குமாறும் சண்டிகர் மூத்த காவல் கண்காணிப்பாளருக்கு (SSP) உத்தரவிட்டுள்ளது.

முந்தைய நீதிமன்றத் தீர்ப்புகளைச் சுட்டிக்காட்டிய உயர் நீதிமன்றம், ஒவ்வொரு வயது வந்த நபரும் தனக்குப் பிடித்த துணையுடன் வாழ்வதற்கான உரிமை பெற்றுள்ளனர் என்று கூறியது. இந்த உரிமை திருமணம் செய்துகொள்பவர்களுக்கு மட்டும் சொந்தமானதல்ல, மாறாக லிவ்-இன் உறவில் வாழ்வோருக்கும் பொருந்தும். இரண்டு வயது வந்தவர்கள் தங்கள் விருப்பப்படி ஒன்றாக வாழ விரும்பினால், அவர்கள் திருமணம் செய்துகொள்ளவில்லை என்றோ அல்லது பெண்ணுக்கு முந்தைய திருமணத்தில் விவாகரத்து கிடைக்கவில்லை என்றோ மட்டுமே அவர்களது உறவைக் குற்றமாகப் கருத முடியாது என்றும் நீதிமன்றம் தெளிவுபடுத்தியுள்ளது.