“மனித உயிர்களுக்கு விலை வைக்கிறதா தவெக அரசு..?” எடப்பாடி பழனிசாமி கடும் சாடல்..!!

கடந்த திமுக ஆட்சிக் காலத்தைப் போலவே, தற்போதைய தவெக அரசும் விலைமதிப்பற்ற மனித உயிர்களுக்குப் பணம் மூலம் விலை வைக்கிறது என்று அதிமுக பொதுச்செயலாளர் எடப்பாடி பழனிசாமி கடுமையாகக் குற்றம் சாட்டியுள்ளார். முந்தைய ஆட்சியில் நடந்ததாகக் கூறப்படும் லாக்அப் மரணங்கள், சிறை மரணங்கள் மற்றும் என்கவுண்டர் சம்பவங்கள் தற்போதைய தவெக ஆட்சியிலும் தொடர்ந்து நீடிப்பதாக அவர் தனது அறிக்கையில் சுட்டிக்காட்டியுள்ளார்.

சமீபத்தில் நாகர்கோவில் சிறையில் மாற்றுத்திறனாளி கைதி ஒருவரும், சென்னை புழல் சிறையில் விசாரணைக் கைதி ஒருவரும் மர்மமான முறையில் உயிரிழந்த சம்பவங்களை எடப்பாடி பழனிசாமி குறிப்பிட்டுள்ளார். இந்த சம்பவங்களால் பாதிக்கப்பட்ட குடும்பங்களுக்கு முறையான நீதியை வழங்காமல், வெறும் நிவாரணத் தொகையைக் கொடுத்து வழக்குகளைச் சமரசம் செய்ய அரசு முயற்சிப்பதாக அவர் விமர்சித்துள்ளார்.

மனித உயிர்களின் மதிப்பை பணத்தைக் கொண்டு தீர்மானிக்க முடியாது என்றும், லாக்அப் மரணங்கள், சிறை மரணங்கள் மற்றும் தேவையற்ற என்கவுண்டர்களைத் தடுக்க தவெக அரசு உடனடியாக உறுதியான சட்ட நடவடிக்கைகளை எடுக்க வேண்டும் என்றும் அவர் வலியுறுத்தியுள்ளார். மேலும், தமிழகத்தில் ஒரு மாற்றத்தை எதிர்பார்த்து தங்களுக்கு வாக்களித்த மக்களுக்கு ஏமாற்றம் தராத வகையில் அரசு பொறுப்புடன் செயல்பட வேண்டும் என்றும் அவர் தனது அறிக்கையில் கேட்டுக் கொண்டுள்ளார்.