“இனி செத்தாலும் அந்தப் பக்கம் போக மாட்டேன்…!” கண்முன்னே அடித்துச் செல்லப்பட்ட 30 உயிர்கள்… 24 மணி நேர மரண போராட்டம்… நேபாள வெள்ளத்தில் உயிர் தப்பிய இந்திய இளைஞர் பகிர்ந்த அதிர்ச்சி உண்மைகள்..!!

உத்தரப் பிரதேசத்தின் கோரக்பூர் பிப்ராய் பகுதியைச் சேர்ந்த ஆசுதோஷ் உபாத்யாயா, இந்த ஆண்டு மார்ச் மாதம் நேபாளத்திற்குச் சென்று ரசுவா பகுதியில் உள்ள நீர்மின் திட்டக் குழாய் அமைக்கும் நிறுவனத்தில் பணியாற்றி வந்தார். பணிபுரியும் இடத்திற்கு அருகில் திரிசூலி நதி பாய்ந்து சென்றது. ஆகஸ்ட் 26 அன்று காலை 9:30 மணியளவில் எவ்வித எச்சரிக்கை சைரனும் ஒலிக்காமல் திடீரென வெள்ளம் சீறிப் பாய்ந்து வந்தது. இதைக் கண்ட ஆசுதோஷும் அவரது சக ஊழியர்களும் உயிரைக் காப்பாற்றிக் கொள்ள அருகில் இருந்த மலையை நோக்கி ஓடினர். ஆனால் அனைவரும் மலையை அடைய முடியவில்லை; சுமார் 25 முதல் 30 பேர் வெள்ளத்தில் குப்பைகளைப் போல அடித்துச் செல்லப்பட்டதை ஆசுதோஷ் நேரில் கண்டார். அவரது சக நண்பர் ஒருவரும் வெள்ள நீரில் மூழ்கிய நிலையில், சுற்றிலும் நீர் சூழ்ந்திருந்ததால் யாராலும் உதவி செய்ய முடியாமல் அலறல் சத்தங்கள் மட்டுமே கேட்டன.

வெள்ளப் பெருக்கினால் மொபைல் நெட்வொர்க் சேவைகள் முற்றிலும் துண்டிக்கப்பட்டுத் தொடர்புகள் உடைந்தன. மலையின் உச்சியில் தஞ்சம் அடைந்த மக்களிடம் போதுமான உணவோ அல்லது குடிநீரோ இல்லை. ஆசுதோஷ் சுமார் 24 மணி நேரம் உணவும் நீருமன்றி, அச்சத்திலும் பீதியிலும் அந்த மலையிலேயே இரவைக் கழித்தார். மறுநாள் அங்கு வந்த மீட்பு ஹெலிகாப்டர் மூலம் மீட்கப்பட்டு காத்மாண்டுவிற்கு அழைத்துச் செல்லப்பட்ட பிறகே தான் பாதுகாப்பாக இருப்பதை அவர் உணர்ந்தார். இதற்கிடையில் இந்தியாவில் உள்ள அவரது குடும்பத்தினர் ஆகஸ்ட் 26 முதல் 27 வரை தொடர்பு கொள்ள முடியாமல் கடும் கவலையில் இருந்த நிலையில், ஆகஸ்ட் 28 அன்று ஆசுதோஷ் போன் செய்து பேசிய பிறகே நிம்மதி அடைந்தனர்.

தற்போது பத்திரமாக இந்தியா திரும்பியுள்ள ஆசுதோஷிடம் மீண்டும் நேபாளத்திற்குச் செல்வீர்களா என்று கேட்டதற்கு, இனி ஒருபோதும் நேபாளத்திற்குச் செல்ல மாட்டேன் என்று திட்டவட்டமாகக் கூறியுள்ளார். தன் கண் முன்னே நண்பர்களும் சக மனிதர்களும் வெள்ளத்தில் அடித்துச் செல்லப்பட்டதும், மரண பயத்துடன் மலையில் கழித்த அந்த இரவும் அவருக்கு இன்றும் நடுக்கத்தை ஏற்படுத்துகின்றன. இந்த பயங்கரமான அனுபவத்தை வாழ்நாளில் என்றும் மறக்க முடியாது என்று அவர் உருக்கத்துடன் தெரிவித்துள்ளார்.