“உயிர் பிரிந்த பிறகும் பார்வை சாத்தியமா..? விஞ்ஞானிகள் செய்த வியக்கவைக்கும் சாதனை..!!”

மனிதன் இறந்த பிறகு அவனது கண்கள் வெளிச்சத்தை உணருமா என்ற கேள்விக்கு அறிவியல் உலகம் வியப்பூட்டும் புதிய பதிலைக் கண்டுபிடித்துள்ளது. ஸ்பெயினில் உள்ள ‘சென்டர் ஃபார் ஜீனோமிக் ரெகுலேஷன்’ விஞ்ஞானிகள் நடத்திய புதிய ஆய்வின்படி, மனிதன் இறந்து 10 மணிநேரம் வரை அவனது கண் விழித்திரை வெளிச்சத்திற்கு எதிர்வினையாற்றும் திறன் கொண்டதாக இருக்கிறது என்று கண்டறியப்பட்டுள்ளது. பொதுவாக, மனிதன் இறந்தவுடன் உடலில் இரத்த ஓட்டம் நின்றுவிடுவதால் விழித்திரைக்குச் செல்லும் ஆக்ஸிஜன் தடைபட்டு, கண் செல்கள் உடனடியாகச் செயலிழந்துவிடும். ஆனால், தற்போது விஞ்ஞானிகள் கண்டுபிடித்துள்ள புதிய தொழில்நுட்பம் இந்த விதியை மாற்றியமைத்துள்ளது.

மனித உடலில் இரத்தம் எவ்வாறு சுழற்சி செய்கிறதோ, அதேபோன்ற ஒரு செயற்கையான இரத்த ஓட்ட அமைப்பை விஞ்ஞானிகள் தங்களின் ஆய்வகத்தில் உருவாக்கினர். இறந்துபோன நபர்கள் தானமாக வழங்கிய கண்கள் இந்த அமைப்பில் வைக்கப்பட்டு, அவற்றுக்குத் தேவையான ஆக்ஸிஜன் மற்றும் ஊட்டச்சத்துக்கள் தொடர்ந்து வழங்கப்பட்டன. இதன் விளைவாக, நபர் இறந்து 10 மணிநேரத்திற்குப் பிறகும், அவரது கண்களில் உள்ள விழித்திரை ஒளியின் மீது படும்போது மின் சமிக்ஞைகளை வெளியிட்டு எதிர்வினையாற்றத் தொடங்கியது. இருப்பினும், இந்தக் கண்கள் மூளையுடன் இணைக்கப்படாததால், இறந்த மனிதனால் மீண்டும் பார்க்க முடியாது; இது செல்களின் அளவிலான ஒரு அறிவியல் செயல்பாடு மட்டுமே என்பதை ஆய்வாளர்கள் தெளிவுபடுத்தியுள்ளனர்.

இந்தக் கண்டுபிடிப்பு உலகளவில் பார்வை குறைபாடு மற்றும் கண் நோய்களால் அவதிப்படும் மில்லியன் கணக்கான மக்களுக்கு ஒரு புதிய நம்பிக்கையை ஏற்படுத்தியுள்ளது. இந்தத் தொழில்நுட்பத்தின் மூலம் தானமாகப் பெறப்படும் விழித்திரைகளை 24 மணிநேரம் வரை எந்தச் சேதமும் இல்லாமல் உயிர்ப்புடன் பாதுகாக்க முடியும். இதனால், விலங்குகளுக்குப் பதிலாக நேரடியாக மனித விழித்திரைகளிலேயே புதிய மருந்துகளைச் சோதித்துப் பார்க்க விஞ்ஞானிகளுக்கு அதிக நேரம் கிடைக்கும். இதன் மூலம் வயதான காலத்தில் ஏற்படும் பார்வை மங்கல் மற்றும் சர்க்கரை நோயினால் கண்கள் பாதிக்கப்படுதல் போன்ற தீவிரமான கண் நோய்களுக்கு விரைவில் புதிய சிகிச்சைகளைக் கண்டறிய வழிவகுக்கும்.