“அப்படிப்போடு..! இனி புக் செய்த 4 மணி நேரத்துல கேஸ் டெலிவரி…! இந்தியன் ஆயிலின் செம ஆஃபர்..!!”

இந்தியன் ஆயில் நிறுவனம் தனது எல்.பி.ஜி நுகர்வோருக்காக ‘Indane XTRALITE NOW’ என்ற புதிய விரைவு விநியோக சேவையை அறிமுகப்படுத்தியுள்ளது. இச்சேவையின் மூலம் வாடிக்கையாளர்கள் ஆர்டர் செய்த 4 மணி நேரத்திற்குள் தங்களுக்கு வசதியான நேரத்தைத் தேர்ந்தெடுத்து சிலிண்டர்களைப் பெற்றுக் கொள்ள முடியும். பாரம்பரிய இரும்புச் சிலிண்டர்களுக்கு மாற்றாக, கையாள்வதற்கும் தூக்குவதற்கும் எளிதான, துருப்பிடிக்காத 10 கிலோ எடை கொண்ட காம்போசிட் சிலிண்டர் இதில் வழங்கப்படுகிறது. தற்போது இச்சேவை தமிழகத்தில் கோயம்புத்தூர் மற்றும் புனே, குருகிராம், இந்தூர் ஆகிய நகரங்களில் தொடங்கப்பட்டுள்ளது; விரைவில் பிற நகரங்களுக்கும் விரிவுபடுத்தப்படவுள்ளது.

இப்புதிய 4 மணி நேர விரைவு விநியோகச் சேவையானது 10 கிலோ XTRALITE சிலிண்டர்களுக்கு மட்டுமன்றி, சிறிய குடும்பங்கள், மாணவர்கள் மற்றும் சிறு வணிகர்களுக்கு ஏற்ற 5 கிலோ ‘Indane chhotu’ எல்.பி.ஜி சிலிண்டர்களுக்கும் பொருந்தும். இச்சேவை மூலம் கேஸ் தட்டுப்பாடு அல்லது தாமதங்களைத் தவிர்த்து வாடிக்கையாளர்கள் உடனடி விநியோகத்தைப் பெற முடியும். நவீன நகர்ப்புறக் குடும்பங்கள் மற்றும் பணிபுரியும் வல்லுநர்களின் அவசரத் தேவைகளைப் பூர்த்தி செய்து, கூடுதல் வசதியையும் பாதுகாப்பையும் வழங்குவதே இதன் முக்கிய நோக்கமாகும்.

வாடிக்கையாளர்கள் இச்சேவையைப் பெற ‘Indianoil ONE’ மொபைல் செயலி அல்லது https://cx.indianoil.in என்ற அதிகாரப்பூர்வ இணையதளம் வழியாக எளிதாக ஆன்லைனில் முன்பதிவு செய்யலாம். இது வெளிப்படையான விநியோகத் தகவல்களையும் சிரமமில்லாத அனுபவத்தையும் உறுதி செய்கிறது. மேலும், எதிர்காலத்தில் 7588888824 என்ற வாட்ஸ்அப் எண் மூலமாகவும் முன்பதிவு செய்யும் வசதி கொண்டுவரப்படும் என இந்தியன் ஆயில் நிறுவனம் தெரிவித்துள்ளது.