“இனி மனுஷன் போக மாட்டான்… ரோபோதான் போகும்..!” வெடிகுண்டு அச்சுறுத்தலுக்கு எண்ட் கார்டு.. ஸ்பெஷல் செல்லின் அதிரடி மாஸ் பிளான்..!!

டெல்லி காவல்துறையினர் வெடிபொருட்கள் மற்றும் சந்தேகத்திற்கிடமான ஆயுதங்களை மனிதர்கள் நேரடியாகக் கையாளாமல் பாதுகாப்பாக அகற்ற ரோபோக்களின் உதவியைப் பெறத் திட்டமிட்டுள்ளனர். டெல்லி காவல் தலைமையகத்தில் வியாழக்கிழமை அன்று இதற்கான செய்முறை விளக்கம் நடத்தப்பட்டது. தொலைவிலிருந்து இயக்கக்கூடிய இந்த ரோபோடிக் வாகனம், 8 கிலோ முதல் 50 கிலோ வரையிலான எடையுள்ள சந்தேகத்திற்கிடமான பொருட்களை ஒரு இடத்திலிருந்து மற்றோரு இடத்திற்கு பாதுகாப்பாக எடுத்துச் செல்லும் திறன் கொண்டது. அவசர காலங்களில் மனித தலையீடு இன்றி வெடிபொருட்களை அப்புறப்படுத்த இது பயன்படுத்தப்படும்.

தலைநகரில் சந்தேகத்திற்கிடமான வெடிபொருட்கள் அல்லது பாம் போன்ற பொருட்கள் கண்டெடுக்கப்படும் போது, காவலர்களின் பாதுகாப்பை மேலும் பலப்படுத்தும் நோக்கத்துடன் இந்தத் தொழில்நுட்பம் கொண்டுவரப்படுகிறது. டெல்லி காவல் தலைமையகத்தில் நடந்த இந்த ரோபோ இயக்கப் பரிசோதனையை ஸ்பெஷல் செல்லின் டிசிபி பிரவீன் குமார் திரிபாதி மற்றும் அவரது குழுவினர் நேரில் ஆய்வு செய்தனர். அப்போது இந்த ரோபோக்களின் இயங்கும் முறை, எடை தூக்கும் திறன் மற்றும் அவசர காலங்களில் இதன் சாத்தியமான பயன்பாடுகள் குறித்து அவர்கள் கேட்டறிந்தனர். இந்த செய்முறை விளக்கத்தில் பல முன்னணி நிறுவனங்கள் கலந்து கொண்டு தங்களது ரோபோ மாதிரிகளை காவல் அதிகாரிகளுக்கு முன்பாக இயக்கிப் காண்பித்தன.

இந்தத் தொழில்நுட்பத்தின் மிக முக்கிய நோக்கம், வெடிபொருட்களை அகற்றும் ஆபத்தான பணியின் போது காவல் துறையினரை எந்தவித ஆபத்தும் இன்றி பாதுகாப்பாக வைப்பதே ஆகும். ஏதேனும் ஒரு இடத்தில் வெடிகுண்டு அல்லது ஆபத்தான பொருட்கள் இருப்பது தெரியவந்தால், மனிதர்களைப் அனுப்பாமல் இந்த ரோபோவையே சம்பவ இடத்திற்கு அனுப்பி அதைச் சோதிக்க முடியும். இதன் மூலம் சந்தேகத்திற்குரிய பொருட்களை அருகில் சென்று அகற்றுவது அல்லது வேறு ஒரு பாதுகாப்பான இடத்திற்கு மாற்றுவது போன்ற பணிகளை மனித உயிருக்கு எந்தப் பாதிப்பும் இன்றிச் செய்ய முடியும்.