“பெண்ணுக்கு உடம்பு சரியில்லைனா மாதவிடாயா..?” அமைச்சர் கீர்த்தனா மீதான அநாகரிக விமர்சனத்திற்கு த.வெ.க. எம்.எல்.ஏ கனிமொழி காட்டமான பதிலடி..!!

தமிழக முதலமைச்சர் விஜய்யின் லண்டன் தொழில் முதலீட்டுப் பயணத்தில், மாநிலத் தொழில்துறை அமைச்சர் கீர்த்தனா பங்கேற்காதது குறித்து எதிர்க்கட்சிகள் பல்வேறு விமர்சனங்களை முன்வைத்து வந்தன. அமைச்சர் கீர்த்தனாவுக்கு உடல்நலக்குறைவு ஏற்பட்டதாகத் தகவல்கள் வெளியான நிலையில், அவரது உடல்நிலையை மாதவிடாய் சுழற்சியுடன் மட்டுமே தொடர்புபடுத்தி, பெண்களை மாதவிடாய் பிரச்சனைக்குள் அடைக்கும் வகையில் எதிர்க்கட்சியினர் பிற்போக்குத்தனமான விமர்சனங்களைச் சமூக வலைத்தளங்களில் பரப்பி வந்தனர்.

இந்த மலிவான மற்றும் அநாகரிகமான அரசியல் விமர்சனங்களுக்குத் தமிழக வெற்றிக் கழக (த.வெ.க.) சட்டமன்ற உறுப்பினர் கனிமொழி சந்தோஷ் தனது சமூக வலைத்தளப் பதிவின் மூலம் காட்டமான பதிலடி கொடுத்துள்ளார். “ஒரு பெண்ணிற்கு உடல்நிலை சரியில்லை என்றாலே அதை மாதவிடாயோடு மட்டுமே ஒப்பிட்டுப் பேசுவது ஆணாதிக்கம் நிறைந்த பிற்போக்குத்தனமான மனநிலை” என்று அவர் கடுமையாகச் சாடியுள்ளார். மேலும், அமைச்சர் கீர்த்தனா லண்டன் பயணம் மேற்கொள்ளாததற்கான உண்மையான காரணத்தையும் அவர் வெளிப்படுத்தியுள்ளார்.

அமைச்சர் கீர்த்தனாவுக்குக் கழுத்தெலும்பு (Collarbone) முறிவு ஏற்பட்டு, அதற்காகக் காமாட்சி மருத்துவமனையில் அறுவை சிகிச்சை செய்யப்பட்டிருந்ததை தான் நேரில் சென்று பார்த்து நலம் விசாரித்ததாகக் கனிமொழி தெரிவித்துள்ளார். அறுவை சிகிச்சைக்குப் பின் மருத்துவர்கள் 20 நாட்கள் முழு ஓய்வு எடுக்க அறிவுறுத்தியிருந்த நிலையிலும், வலி நிவாரணிகளை எடுத்துக் கொண்டு வெறும் 4 நாட்களிலேயே அவர் மீண்டும் மக்கள் பணிக்குத் திரும்பியுள்ளார். மருத்துவமனை படுக்கையில் இருந்தபோது கூட, முதலமைச்சரின் லண்டன் பயணத்திற்கான ஆயத்தப் பணிகளை அவர் தொடர்ந்து கவனித்து வந்தார் என்று கூறி, பெண்களின் அர்ப்பணிப்பைக் கேலிப் பொருளாக்க வேண்டாம் என கனிமொழி வலியுறுத்தியுள்ளார்.