தமிழக பாஜகவில் அதிரடி மாற்றம்..! எல்.முருகன் ராஜினாமாவைத் தொடர்ந்து புதிய தலைவர் யார்..? லிஸ்டில் இருக்கும் அந்த 2 பேர்..!!

தமிழக பாஜகவில் விரைவில் தலைவர் மாற்றம் நிகழலாம் என்ற தகவல்கள் அரசியல் வட்டாரங்களில் பரவலாகப் பேசப்பட்டு வருகின்றன. அண்மையில் நடைபெற்ற சட்டசபை தேர்தலில் கட்சி சந்தித்த தோல்வியின் எதிரொலியாக இந்த அதிரடி மாற்றங்கள் திட்டமிடப்பட்டு வருவதாகக் கூறப்படுகிறது. இதன் ஒரு பகுதியாக, மத்திய அமைச்சராகப் பொறுப்பு வகித்த எல்.முருகன் தனது பதவியை திடீரென ராஜினாமா செய்திருப்பது இந்தத் தலைவர் மாற்றத்திற்கான யூகங்களை மேலும் வலுப்படுத்தியுள்ளது.

தற்போதுள்ள சூழலில், எல்.முருகன் மீண்டும் தமிழக பாஜக தலைவராக நியமிக்கப்படலாம் என்றும், தற்போதைய தலைவராக இருக்கும் நயினார் நாகேந்திரனுக்கு மத்திய அமைச்சர் பதவி வழங்கப்படலாம் என்றும் டெல்லி வட்டாரங்கள் தெரிவிக்கின்றன. கட்சியின் அடிமட்டத் தொண்டர்களை ஒருங்கிணைக்கவும், வரும் தேர்தல்களுக்குக் கட்சியைத் தயார்படுத்தவும் எல்.முருகனின் முந்தைய தலைமைத்துவ அனுபவம் உதவும் என்று கட்சித் தலைமை கருதுவதாகத் தெரிகிறது.

இருப்பினும், புதிய தலைவர் பதவிக்கான போட்டியில் எல்.முருகன் மட்டுமின்றி மேலும் சில முக்கியப் பெயர்களும் முன்னிலையில் உள்ளன. குறிப்பாக, அண்மையில் பாஜவுடன் இணைந்த நடிகர் சரத்குமார் மற்றும் வானதி சீனிவாசன் ஆகியோரது பெயர்களும் இந்தப் பட்டியலில் பலமாக அடிபடுகின்றன. தமிழகத்தில் கட்சியின் அடுத்தகட்ட நகர்வை தீர்மானிக்கும் இந்தத் தலைவர் மாற்றம் குறித்த அதிகாரப்பூர்வ அறிவிப்பு விரைவில் வெளியாகலாம் என எதிர்பார்க்கப்படுகிறது.