நெஞ்சை உலுக்கும் கொடூரம்…தோழியிடம் சிறுமி சொன்ன ரகசியம்… அம்பலமான ஓராண்டு பாலியல் வன்கொடுமை…! போக்சோ வழக்கில் சென்னை உயர் நீதிமன்றத்தின் அதிரடி மரணத் தீர்ப்பு!

ஆறு முதல் எட்டு வயதுக்குட்பட்ட மூன்று சிறுமிகளைத் தொடர்ந்து பாலியல் வன்கொடுமை செய்த குற்றவாளிக்கு, போக்சோ சிறப்பு நீதிமன்றம் விதித்த மரண தண்டனையை சென்னை உயர் நீதிமன்றம் உறுதி செய்துள்ளது. இந்த வழக்கை விசாரித்த நீதிபதிகள் அமர்வு, குழந்தைகளுக்கு எதிரான இத்தகைய குற்றங்கள் “கொலையை விடவும் கொடூரமானவை” என்று மிகக் கடுமையான கருத்துக்களைத் தெரிவித்துள்ளது. கொலையை விட இத்தகைய குற்றங்களுக்குக் கூடுதல் கடுமையான தண்டனைகள் வழங்கப்பட வேண்டும் என்றும் நீதிமன்றம் குறிப்பிட்டுள்ளது.

கிட்டத்தட்ட ஒரு வருட காலமாக, ஒவ்வொரு சனிக்கிழமையும் அந்தச் சிறுமிகளைக் கத்தியைக் காட்டி மிரட்டி, ஒரு வீட்டிற்குள் அடைத்து வைத்து இந்தக் கொடூரத்தைச் செய்துள்ளார். ஒரு சிறுமி தன் தோழியிடம் இது குறித்துப் பேசியதை அவளது தாய் தற்செயலாகக் கேட்ட பிறகே இச்சம்பவம் வெளிச்சத்திற்கு வந்துள்ளது. பாதிக்கப்பட்ட சிறுமிகளின் வாக்குமூலங்கள் இயற்கையாகவும், நம்பகத்தன்மையுடனும் இருப்பதாகக் கூறி, குற்றவாளி தாக்கல் செய்த மேல்முறையீட்டு மனுவை நீதிமன்றம் தள்ளுபடி செய்தது.

வழக்குத் தொடர தாமதமானதை ஒரு தற்காப்பு வாதமாக ஏற்க முடியாது என்று நீதிபதிகள் திட்டவட்டமாகக் கூறினர். இத்தகைய பாலியல் குற்றங்களில், சமூக அவப்பெயர் மற்றும் சட்ட நடைமுறைகளால் ஏற்படும் மன உளைச்சல் காரணமாகவே குடும்பத்தினர் புகார் அளிக்கத் தயங்குவதாக அவர்கள் சுட்டிக்காட்டினர். “குழந்தை மீதான பாலியல் வன்கொடுமை என்பது அக்குழந்தையின் கண்ணியம் மற்றும் ஆன்மாவின் மீது நடத்தப்படும் தாக்குதல்; இதில் உடல் உயிர் வாழ்ந்தாலும், ஆன்மா அழிந்துவிடுகிறது” என்று நீதிபதிகள் தங்களது தீர்ப்பில் உருக்கமாகக் குறிப்பிட்டுள்ளனர்.