CINEMA
சிங்கிள்ஸ் அகராதியின் முதல் பக்கம்.. திடீரென முழு குடும்பஸ்தனாக மாறிய பிரேம்ஜி… இன்று வீட்டில் என்ன வீட்டில்…மாநாடு’ சூட்டிங் ஸ்பாட்டில் நடந்த சுவாரசியம்…சிம்புவின் கணிப்பு பலித்ததா…
தமிழ் திரையுலகில் நடிகர், இசையமைப்பாளர், பாடகர் என பன்முகத்திறமைகளைக் கொண்ட பிரேம்ஜி அமரன் – இந்து தம்பதியினர் இன்று தங்களது இரண்டாவது ஆண்டு திருமண நாளைக் கொண்டாடி வருகின்றனர். முன்னணி இயக்குநர் வெங்கட் பிரபுவின் தம்பியான பிரேம்ஜி, வெளிநாட்டில் இசை படித்துவிட்டு யுவன் ஷங்கர் ராஜாவிடம் உதவியாளராகத் தன் பயணத்தைத் தொடங்கினார். பின்னர், இவருக்குள் இருந்த நடிப்புத் திறமையைக் கண்டறிந்து, நடிகர் சிலம்பரசன் தான் இவரை முதன்முதலில் சினிமாவுக்குள் அழைத்து வந்தார். கோலிவுட்டின் ‘முன்னணி சிங்கிள்’ என ரசிகர்களால் அன்போடு அழைக்கப்பட்ட பிரேம்ஜி, சேலத்தைச் சேர்ந்த இந்து என்ற பெண்ணுடன் சமூக வலைத்தளம் மூலம் பழகி, அது காதலாக மாறியதையடுத்து, கடந்த இரண்டு வருடங்களுக்கு முன்பு குடும்பத்தினர் சம்மதத்துடன் இல்லற வாழ்க்கையில் இணைந்தார்.
பிரேம்ஜிக்கு எப்போது திருமணம் நடக்கும் என அவரது குடும்பத்தினர் ஏங்கியிருந்த வேளையில், அவரது காதலைக் கேட்டு அண்ணன் வெங்கட் பிரபு தந்தை ஸ்தானத்தில் இருந்து திருத்தணியில் வைத்து மிக எளிமையான முறையில் திருமணத்தை முன்நின்று நடத்தி வைத்தார். இவர்களது திருமணத்தில் திரைத்துறையைச் சேர்ந்த ஜெய், வைபவ், டிடி, சங்கீதா உள்ளிட்ட நெருங்கிய நண்பர்கள் மட்டுமே கலந்துகொண்டனர். திருமணத்திற்குப் பிறகு பார்ட்டி, கொண்டாட்டங்கள் என அனைத்தையும் தவிர்த்துவிட்டு, முழு குடும்பஸ்தனாக மாறிய பிரேம்ஜி, கடந்த ஆண்டு தங்களுக்குப் பிறந்த பெண் குழந்தையினால் தற்போது கூடுதல் பொறுப்புடன், வேலை மற்றும் குடும்பம் எனத் தன் வாழ்க்கையை அர்ப்பணிப்புடன் கவனித்து வருகிறார்.
இன்று தங்களது 2-வது திருமண நாளைக் கொண்டாடும் இத்தம்பதியினர், சமூக வலைத்தளங்களில் பகிர்ந்துள்ள ஒரு சுவாரசியமான வீடியோ இணையத்தில் காட்டுத்தீயாய் பரவி வருகிறது. ‘மாநாடு’ திரைப்பட படப்பிடிப்பின் போது நடிகர் சிலம்பரசன் பிரேம்ஜியிடம், “உனக்கு 100 சதவீதம் திருமணம் ஆகிவிடும், என் கணிப்புப்படி இந்நேரம் உனக்கான பெண் வந்திருக்க வேண்டும், பாரு” என்று தீர்க்கதரிசனமாகக் கூறிய வீடியோவை தற்போது இந்த தம்பதி நெகிழ்ச்சியோடு பகிர்ந்துள்ளனர். சிம்புவின் அந்த பழைய கணிப்பு இன்று உண்மையாகி, ஒரு குழந்தைக்கு தந்தையாக பிரேம்ஜி மகிழ்ச்சியாக வலம் வருவதைக் கண்டு ரசிகர்களும் திரையுலகினரும் தம்பதியினருக்கு தங்களது வாழ்த்துகளைக் குவித்து வருகின்றனர்.
