“பள்ளிக்கே அனுப்ப பயமா இருக்கு..” மாணவனின் தலையை ஜாக்கெட்டால் மூடி ரத்தம் சொட்டச் சொட்ட தாக்குதல்..! வகுப்பறையில் அரங்கேறிய கொடூரம்.. அலறும் பெற்றோர்..!!

ஹரியானா மாநிலம் சோனிபட் மாவட்டம் பகல்கர் பகுதியில் உள்ள ஒரு தனியார் பள்ளியில், 11ஆம் வகுப்பு மாணவன் மீது அவனுடன் பயிலும் 5 மாணவர்கள் இணைந்து கொடூரமாகத் தாக்குதல் நடத்தியுள்ள சம்பவம் அதிர்ச்சியை ஏற்படுத்தியுள்ளது. விளையாட்டாகத் தொடங்கிய இந்த மோதலில், பாதிக்கப்பட்ட மாணவனின் தலையில் ஜாக்கெட்டைப் போர்த்தி மறைத்துவிட்டு, ஐந்து பேரும் சேர்ந்து சரமாரியாகத் தாக்கியுள்ளனர். இந்தத் தாக்குதலில் மாணவனின் தலையில் பலத்த காயம் ஏற்பட்டு ரத்தம் கொட்டியுள்ளது. உடனடியாக அவன் சோனிபட் சிவில் மருத்துவமனைக்குக் கொண்டு செல்லப்பட்டு, அங்கு அவனது தலையில் மருத்துவர்கள் தையல் போட்டனர்.

இந்தச் சம்பவம் வெளிச்சத்திற்கு வந்ததும், காயமடைந்த மாணவனின் பெற்றோர் பள்ளி நிர்வாகத்தின் மீது கடுமையான குற்றச்சாட்டுகளை முன்வைத்துள்ளனர். வகுப்பறைக்குள் இந்த வன்முறைச் சம்பவம் நடைபெற்றபோது அங்கு எந்தவொரு ஆசிரியரும் இருக்கவில்லை என்று பெற்றோர் குற்றம் சாட்டியுள்ளனர். மேலும், இதற்கு முன்பும் பாதிக்கப்பட்ட மாணவனின் சகோதரனுடன் இதேபோல தாக்குதல் நடத்தப்பட்டதாகத் தெரிவித்த அவர்கள், பள்ளி நிர்வாகத்திடம் இதுகுறித்து உரிய கடுமையான நடவடிக்கை எடுக்க வேண்டும் என்று கோரிக்கை விடுத்துள்ளனர்.

இதற்கிடையே, விவகாரம் விஸ்வரூபம் எடுத்ததைத் தொடர்ந்து, பள்ளி நிர்வாகம் உடனடியாக நடவடிக்கை எடுத்து குற்றம் சாட்டப்பட்ட 5 மாணவர்களையும் பள்ளியிலிருந்து இடைநீக்கம் செய்துள்ளது. இந்தச் சம்பவம் தொடர்பான சிசிடிவி காட்சிகளைப் பரிசீலித்து வருவதாகவும், உண்மை நிலையைக் கண்டறிய ஒரு ஒழுங்கு நடவடிக்கைக் குழு அமைக்கப்பட்டுள்ளதாகவும் பள்ளி முதல்வர் தெரிவித்துள்ளார். இதற்கிடையே, பாதிக்கப்பட்ட குடும்பத்தினரின் புகாரின் அடிப்படையில் உள்ளூர் காவல்துறையினரும் விசாரணையைத் தொடங்கியுள்ளதோடு, உரிய ஆதாரங்களின் அடிப்படையில் சட்டப்பூர்வ நடவடிக்கைகளையும் மேற்கொண்டு வருகின்றனர்.