சூர்யாவின் அதிரடி கம்பேக்… பாக்ஸ் ஆபீஸில் ₹300 கோடி வேட்டை… ‘த்ரிஷ்யம் 3’ படத்தின் புதிய சாதனை… ட்வீட் போட்டு பிரம்மாண்டத்தை அறிவித்த மோகன்லால்…இந்த ஆண்டின் டாப் பாக்ஸ் ஆபீஸ் கிங் யார்…!

இந்த ஆண்டு தொடங்கி ஐந்து மாதங்கள் கடந்துவிட்ட நிலையில், தமிழ் திரையுலகிற்கு ஒரு மெகா பிளாக்பஸ்டர் திரைப்படம் கூட அமையவில்லையே என்று ஏங்கிக் கொண்டிருந்த ரசிகர்களுக்கும் திரையரங்கு உரிமையாளர்களுக்கும் நடிகர் சூர்யாவின் ‘கருப்பு’ திரைப்படம் பெரும் ஆறுதலாக அமைந்துள்ளது. ஆர்ஜே பாலாஜி இயக்கத்தில் வெளியான இத்திரைப்படம், உலகளவில் 300 கோடி ரூபாய் வசூலை ஈட்டி சாதனை படைத்துள்ளது. முன்னதாக சுதா கொங்கரா இயக்கத்திலான ‘புறநானூறு’ திரைப்படத்திலிருந்து சூர்யா விலகிய நிலையில், இந்த மாபெரும் பாக்ஸ் ஆபீஸ் வெற்றி கோலிவுட்டைக் காப்பாற்றியுள்ளது. நடப்பாண்டில் வெளியான பராசக்தி, தாய் கிழவி, யூத் உள்ளிட்ட தமிழ் படங்கள் 100 கோடிக்கும் குறைவான வசூலையே ஈட்டியிருந்த சூழலில், ‘கருப்பு’ திரைப்படத்தின் இந்த அசுர வேட்டை தமிழ் சினிமாவை மீண்டும் நிமிரச் செய்துள்ளது.

கோலிவுட்டில் சூர்யா வசூல் வேட்டை நடத்திக் கொண்டிருக்க, மறுபுறம் மாலிவுட்டில் நடிகர் மோகன்லாலின் ‘த்ரிஷ்யம் 3’ திரைப்படம் மலையாள சினிமாவிற்கு பிரம்மாண்ட வெற்றியைத் தேடித்தந்துள்ளது. ஏற்கனவே வெளியான இதன் முதல் இரண்டு பாகங்களும் 100 கோடி ரூபாய் வசூலைக் கடந்த நிலையில், தற்போது வெளியாகியுள்ள 3ஆம் பாகம் வெறும் 7 நாட்களில் உலகளவில் 200 கோடி ரூபாய் கிளப்பில் இணைந்துள்ளதாக மோகன்லால் தனது அதிகாரப்பூர்வ சமூக வலைத்தளப் பக்கத்தில் மகிழ்ச்சியுடன் அறிவித்துள்ளார். மோகன்லால் நடிப்பில் வெளியான எம்புரான், தொடரும் ஆகிய படங்கள் 250 கோடி வசூலையும், ஹிருதயப்பூர்வம் 100 கோடி வசூலையும் பெற்றிருந்த நிலையில், தற்போது 300 கோடி வசூலுடன் மலையாள திரையுலகின் நம்பர் ஒன் பாக்ஸ் ஆபீஸ் படமாக இருக்கும் கல்யாணி பிரியதர்ஷனின் ‘லோகா’ திரைப்படத்தின் சாதனையை ‘த்ரிஷ்யம் 3’ இன்னும் ஒரு வாரத்தில் முறியடிக்கும் என எதிர்பார்க்கப்படுகிறது.

இந்திய அளவில் பாக்ஸ் ஆபீஸ் நிலவரத்தைப் பார்க்கும்போது, பாலிவுட் திரைப்படமான ‘துரந்தர் 2’ இந்த ஆண்டு 1800 கோடிக்கும் மேல் வசூலித்து, ‘புஷ்பா 2’ படத்தின் சாதனையை முறியடித்து இந்திய சினிமாவையே வியப்பில் ஆழ்த்தியுள்ளது. அதேபோல், டோலிவுட் எனப்படும் தெலுங்கு திரையுலகில் இந்த ஆண்டு சிரஞ்சீவி மற்றும் நயன்தாரா நடிப்பில் வெளியான ‘மன சங்கர வரபிரசாத் காரு’ திரைப்படம் மட்டுமே 300 கோடி வசூலைக் கடந்து சாதனை படைத்துள்ளது. மொழிகளைக் கடந்து தரமான கதைக் களம் கொண்ட திரைப்படங்கள் பாக்ஸ் ஆபீஸில் தொடர்ந்து பல நூறு கோடிகளைக் குவித்து வருவதை இந்த ஆண்டின் வசூல் நிலவரங்கள் தெளிவாக உணர்த்துகின்றன.