“யோவ் என்னப்பா சொல்றீங்க..? உலகமே அழிஞ்சாலும் இந்த ஒரு பூச்சி மட்டும் சாகவே சாகாதா..?!” என்னதுன்னு தெரியமா…? விஞ்ஞானிகள் சொன்ன ஷாக்கிங் மேட்டர்..!!

இந்த உலகத்தில் அணு வெடிப்பு, நிலநடுக்கம், சுனாமி, போர், பனிமழைச் சரிவு என எவ்வளவு பெரிய இயற்கை பேரழிவுகள் வந்தாலும் அசராமல் தப்பித்து வாழக்கூடிய திறன் கரப்பான் பூச்சிகளுக்கு இருப்பதாக விஞ்ஞானிகள் கூறுகின்றனர். டைனோசர்கள் பூமிக்கு வருவதற்கு பத்து கோடி ஆண்டுகளுக்கு முன்பாகவே சுமார் 32 கோடி ஆண்டுகளாக இவை பூமியில் வாழ்ந்து வருகின்றன. மனிதர்கள் பூமிக்கு வருவதற்கு பல ஆண்டுகளுக்கு முன்பாகவே வாழத் தொடங்கிய இந்தச் சிறிய பூச்சி, மனித இனமே அழிந்த பிறகும் கூட பூமியில் தொடர்ந்து வாழும் என்று ஆராய்ச்சியாளர்கள் தெரிவிக்கின்றனர்.

கரப்பான் பூச்சிகள் உணவைப் பற்றி கவலைப்படுவதே இல்லை. சாதாரண உணவுகள் கிடைக்காத போதும் மரப்பட்டை, காகிதம், பசைகள், சோப்பு, முடி, தோல் பொருட்கள் மற்றும் துணி என எதை வேண்டுமானாலும் சாப்பிட்டு உயிர்வாழும். இவற்றின் வயிற்றில் இருக்கும் சிறப்பு பாக்டீரியாக்கள் இந்த விசித்திரப் பொருட்களைச் செரித்து சத்துக்களாக மாற்றுகின்றன. இதனால் தண்ணீர் இல்லாமல் ஒரு வாரமும், உணவே இல்லாமல் ஒரு மாதத்திற்கு மேலாகவும் இவற்றால் வாழ முடியும்; தகுந்த சூழலுக்கு ஏற்ப இவை உடலின் வளர்சிதை மாற்றத்தைக் குறைத்து ஆற்றலைச் சேமித்துக் கொள்கின்றன. மேலும், தலை துண்டிக்கப்பட்ட பிறகும் கூட மூக்கு அல்லது வாய்க்குப் பதிலாக உடலின் பக்கவாட்டுத் துளைகள் வழியே சுவாசித்து ஒரு வாரம் வரை உயிர்வாழும். இறுதியில் தலை இல்லாததால் தண்ணீர் குடிக்க முடியாமல் ஏற்படும் நீர்ச்சத்து குறைபாட்டால் மட்டுமே இறந்துபோகின்றன.

பூமியில் அணு ஆயுதப் போர் வந்தாலும் கரப்பான் பூச்சிகள் மனிதர்களை விட 15 மடங்கு அதிகமான அணுக்கதிர்வீச்சைத் தாங்கும் சக்தி கொண்டவை. இவற்றின் செல்லுலார் பிரிவு மிக மெதுவாக நடப்பதால் கதிர்வீச்சால் DNA எளிதில் பாதிக்கப்படுவதில்லை. நெகிழ்வுத்தன்மை கொண்ட வெளிச்சட்டகம் இருப்பதால், தம் உடலை 25% வரை சுருக்கிக்கொண்டு குறுகிய சந்துகளிலும் சுவர்களின் விரிசல்களிலும் சுலபமாக ஒளிந்துகொள்கின்றன. அதுமட்டுமின்றி, நாம் தெளிக்கும் பூச்சிக்கொல்லி மருந்துகளை எதிர்த்து வாழும் வகையில் மரபணுக்களை மிக வேகமாக மாற்றிக்கொள்கின்றன; ஒரு தலைமுறையைக் கொல்லும் விஷத்திற்கு அடுத்த தலைமுறைப் பூச்சிகள் இயல்பாகவே எதிர்ப்புத் திறனுடனே பிறக்கின்றன.