“கல்யாணம் பண்ணிக்கோ…” மறுத்த பெண் RTO அதிகாரி… சுத்தியலால் அடித்து படுகொலை செய்துவிட்டு காதலன் தற்கொலை.. பகீர் சம்பவம்..!!

மத்தியப் பிரதேச மாநிலத்தின் தலைநகரான போபாலில் நெஞ்சை நடுங்க வைக்கும் கொடூர சம்பவம் ஒன்று நடந்துள்ளது. போபால் லேக்பர்ல் காலனியில் ஆர்டிஓ ஆய்வாளர் மீனாட்சி கோகலே கொடூரமான முறையில் கொலை செய்யப்பட்டுள்ளார். மீனாட்சி அங்குள்ள தனது காதலனின் வீட்டிற்குச் சென்றிருந்தபோது, அவரைத் திருமணம் செய்ய மறுத்ததால் ஆத்திரமடைந்த காதலன், சுத்தியலால் தலையில் அடித்துக் கொலை செய்ததாகக் கூறப்படுகிறது. அதன்பின்னர், வீட்டின் சற்று தொலைவில் சென்று அவனும் தூக்கிட்டுத் தற்கொலை செய்துகொண்டான். தகவலறிந்து வந்த காவல்துறையினர் இருவரின் உடல்களையும் கைப்பற்றி பிரேதப் பரிசோதனைக்காக அனுப்பி வைத்துள்ளனர்.

காவல்துறையினரின் கூற்றுப்படி, ததியாவில் பணியாற்றி வந்த 45 வயதான மீனாட்சியின் சடலம், அவரது காதலன் பவன் குமார் திவேதியின் வீட்டில் கண்டெடுக்கப்பட்டது. மீனாட்சியின் தலையில் சுத்தியலால் நான்கு முறை பலமாகத் தாக்கிக் கொலை செய்யப்பட்டுள்ளார். இந்தச் சம்பவத்திற்குப் பிறகு குற்றவாளியான பவனும் தூக்கிட்டுத் தற்கொலை செய்துகொண்டான். ஆரம்பகட்ட விசாரணையில், திருமணப் பேச்சுவார்த்தை தொடர்பாக ஏற்பட்ட தகராறே இந்த அசம்பாவிதத்திற்கு காரணம் எனப் தெரியவந்துள்ளது. இச்சம்பவம் போபாலின் கஜூரி காவல் எல்லைக்குட்பட்ட லேக்பர்ல் காலனியில் நிகழ்ந்துள்ளது.

திங்கள்கிழமை காலை சம்பவ இடத்திற்கு வந்த காவல்துறையினர் நடத்திய விசாரணையில், மீனாட்சி வீட்டின் முற்றத்தில் வைத்து தான் கொலை செய்யப்பட்டுள்ளார் என்பதும், பின்னர் அவரது சடலம் இழுத்துச் செல்லப்பட்டு அறைக்குள் போடப்பட்டுள்ளது என்பதும் தெரியவந்தது. ஞாயிற்றுக்கிழமை மாலை சுமார் 7 மணியளவில் ஆர்டிஓ ஆய்வாளர் மீனாட்சி, தனது தோழி கிருத்திகாவுடன் பவன் குமார் திவேதியின் வீட்டிற்கு வந்துள்ளார். இரவில் கிருத்திகா மீனாட்சியின் மூன்று வயது பெண் குழந்தையுடன் உள் அறையில் தூங்கச் சென்றுள்ளார். ஆனால் காலையில் எழுந்து பார்த்தபோது, வெளியறையில் மீனாட்சி பிணமாகக் கிடந்துள்ளார். பவன் சுமார் ஒன்பது மாதங்களுக்கு முன்பே இந்த காலனியில் குடியேறியதாகவும், சுற்றியுள்ளவர்களிடம் மீனாட்சியை தனது மனைவி என்றும், குழந்தையை தனது மகள் என்றும் கூறி வந்ததாகவும் காவல்துறை தெரிவித்துள்ளது. பவன் மீனாட்சியை திருமணம் செய்ய விரும்பிய நிலையில், மீனாட்சி அதற்குச் சம்மதிக்காததால் ஏற்பட்ட தகராறில் இக்கொலை மற்றும் தற்கொலை நடந்துள்ளது.