“பயங்கரம்.. மகளின் கண்முன்னே தந்தைக்கு நேர்ந்த கொடூரம்..” வீடு புகுந்து முகமூடி அணிந்து வந்த 3 பேரின் வெறிச்செயல்.. நெஞ்சை பதறவைக்கும் பின்னணி..!!

திருத்தணி பெரியார் நகரைச் சேர்ந்த திரையரங்க ஊழியரான 46 வயது ராஜா, கடந்த ஞாயிற்றுக்கிழமை மாலை அவரது வீடு புகுந்து, மனைவி மற்றும் மகள்களின் கண் முன்னே முகமூடி அணிந்த 3 பேர் கொண்ட கும்பலால் கொடூரமாக வெட்டிப் படுகொலை செய்யப்பட்டார். இந்தத் துயரச் சம்பவத்திற்கு, ராஜாவின் 12-ஆம் வகுப்பு படிக்கும் மூத்த மகளுக்கு ஏற்பட்ட ஒருதலைப்பட்ச காதல் விவகாரமும், அதன் தொடர்ச்சியாக நிகழ்ந்த வன்முறைச் செயல்களுமே முதன்மைக் காரணமாகக் கூறப்படுகிறது. மாணவி வேறொரு இளைஞருடன் பழகியதால் ஆத்திரமடைந்த இந்திரா நகரைச் சேர்ந்த ஒரு சிறுவன், தனது நண்பர்களான லாரன்ஸ், சுசில் மற்றும் ரோஸி ஆகியோருடன் சேர்ந்து, அந்த இளைஞரைத் தாக்கியதோடு மாணவிக்கும் கத்தியைக் காட்டி கொலை மிரட்டல் விடுத்துள்ளார்.

இதுகுறித்து மாணவியின் தாய் துர்கா அளித்த புகாரின் பேரில், காவல்துறையினர் லாரன்ஸ் என்பவரை ஞாயிற்றுக்கிழமை கைது செய்தனர். இதனால் ஆத்திரமடைந்த லாரன்ஸின் தம்பி சுசில் மற்றும் அவரது நண்பர்கள், பழிவாங்கும் நோக்கில் ராஜா தங்கியிருந்த வீட்டிற்குள் புகுந்து பட்டாக்கத்தியால் அவரது தலை மற்றும் கழுத்துப் பகுதிகளில் சரமாரியாக வெட்டியுள்ளனர். ரத்த வெள்ளத்தில் சரிந்த ராஜாவை மீட்டு திருத்தணி அரசு மருத்துவமனைக்குக் கொண்டு சென்றபோதிலும், அவர் சிகிச்சை பலனின்றி பரிதாபமாக உயிரிழந்தார். தனது மகள் கொடுத்த புகாரின் மீது காவல்துறையினர் உடனடியாக நடவடிக்கை எடுத்து சம்பந்தப்பட்டவர்களைக் கைது செய்யத் தவறியதே, இந்தத் துணிகரக் கொலைக்குக் காரணம் என்று ராஜாவின் குடும்பத்தினர் குற்றம்சாட்டியுள்ளனர்.

இக்கொலைச் சம்பவத்தைக் கண்டித்தும், குற்றவாளிகளை உடனடியாகக் கைது செய்ய வலியுறுத்தியும் ராஜாவின் குடும்பத்தினரும் பொதுமக்களும் திருத்தணி அரசு மருத்துவமனையில் திரண்டு காவல்துறையினருடன் கடுமையான வாக்குவாதத்தில் ஈடுபட்டனர். குற்றவாளிகளை என்கவுண்டர் செய்ய வேண்டும் என்றும், அதுவரை உடலைப் பெற்றுக்கொள்ள மாட்டோம் என்றும் கூறி அவர்கள் போராட்டம் நடத்தினர். மேலும், விநாயகர் சதுர்த்தி விழாவின்போது லாரன்ஸ் மற்றும் அவரது தம்பி பட்டாக்கத்தியுடன் பொதுமக்களை மிரட்டியதாகவும், அப்பகுதியில் போதைப்பொருள் புழக்கம் மற்றும் குற்றச் செயல்களைத் தடுக்கத் தவறிய காவல் அதிகாரிகள் மீது உரிய நடவடிக்கை எடுக்க வேண்டும் என்றும் பொதுமக்கள் கோரிக்கை விடுத்துள்ளனர்.