“இனிமே இந்த பக்கமே வரமாட்டேன்..” 100 மூட்டைப்பூச்சி கடியால் அலறிய பெண்… கை வீங்கி அவசர பிரிவில் அனுமதி..! ஹோட்டலில் நடந்த பகீர் சம்பவம்..!!

பிரிட்டனின் எக்ஸெட்டர் நகரில் உள்ள ‘ஹாலிடே இன் எக்ஸ்பிரஸ்’ ஹோட்டலில் தங்கிய 46 வயதான நிகோலா ஜென்கின்ஸ் என்ற பெண்ணிற்கு அது ஒரு பயங்கரமான அனுபவமாக மாறியது. அலுவலக வேலை காரணமாக அங்கு தங்கியிருந்த போது, அவரது உடலில் 100-க்கும் மேற்பட்ட மூட்டைப்பூச்சிகள் கடித்தன. முகம், கழுத்து, கைகள், முதுகு மற்றும் வயிறு போன்ற இடங்களில் கடித்த அடையாளங்கள் காணப்பட்டன. படுக்கையை பரிசோதித்தபோது, ரசாயனப் போர்வையின் மேல் மூட்டைப்பூச்சி ஊர்வதையும், மெத்தைக்குள் சுமார் 40 செத்த மூட்டைப்பூச்சிகள் இருப்பதையும் கண்டு அதிர்ச்சியடைந்தார். இது குறித்து ஹோட்டல் நிர்வாகத்திடம் புகார் அளித்தபோது, பணத்தைத் திருப்பித் தர மறுத்து, வெறும் இலவசக் காபி மட்டுமே தருவதாகக் கூறியதால், அவர் உடனடியாக வேறு ஹோட்டலுக்கு மாறினார்.

ஹோட்டலை மாற்றிய பிறகும் அவரது துயரம் தீரவில்லை. அடுத்த சில நாட்களில் அரிப்பும் எரிச்சலும் அதிகரித்து, இடது கையில் கடுமையான வீக்கம் ஏற்பட்டு தோல் சிவந்து போனது. நிலைமை மோசமடைந்ததைத் தொடர்ந்து, அக்டோபர் 19 அன்று அவர் மருத்துவமனையின் அவசர சிகிச்சைப் பிரிவில் அனுமதிக்கப்பட்டார். மருத்துவர்கள் அவரைப் பரிசோதித்து, வீக்கத்தைக் குறைக்க ஸ்டீராய்டு மருந்துகளை வழங்கி சிகிச்சை அளித்தனர். இந்தச் சம்பவத்தால் ஏற்பட்ட மன உளைச்சல் காரணமாக, அவர் தனது உறவினரின் விசேஷ நிகழ்ச்சியில் பங்கேற்க முடியாமல் வீடே கதி என்று இருக்கும் சூழல் ஏற்பட்டது.

நிகோலாவின் அலுவலகத் தரப்பிலிருந்து புகார் அளிக்கப்பட்ட பிறகு, ஹோட்டல் நிர்வாகம் தங்களது அறையில் மூட்டைப்பூச்சிகள் இருந்ததை ஒப்புக்கொண்டது. மேலும், அவருக்கு இழப்பீடாக ஒரு வார இறுதி நாளில் இலவசமாகத் தங்கும் வாய்ப்பை வழங்குவதாகத் தெரிவித்தது. ஆனால், ஹோட்டல் மீது இருந்த நம்பிக்கை முற்றிலுமாகப் போய்விட்டதால், நிகோலா அந்த வாய்ப்பை நிராகரித்துவிட்டார். இச்சம்பவம் குறித்து பேசிய ஹோட்டல் நிர்வாகத்தின் செய்தித் தொடர்பாளர், வாடிக்கையாளர்களின் சுகாதாரம் மற்றும் பாதுகாப்பிற்கு தாங்கள் முன்னுரிமை அளிப்பதாகவும், இந்தச் சம்பவம் குறித்து விரிவான விசாரணை நடத்தி வருவதாகவும் தெரிவித்துள்ளார்.